Bilong Wanem Ol Narapela I Lusim Bilip long God

Sapos i gat Wanpela long husat yumi olgeta mas putim bilip, i no gat narapela. Em i God, i no ol narapela man olsem yumi. (If there is one Being in whom all of us should trust, it is no other than God — not our fellow man.) Jeremaia 17:5,7 i tok,

5 BIKPELA i tok olsem, Tok nogut i stap long man husat i putim bilip long man, na mekim samting bilong bodi i kamap han bilong em, na husat bel bilong em i lusim BIKPELA. 

7 Blesing i stap long man husat i putim bilip long BIKPELA, na husat hop bilong em i stap long BIKPELA.

Baibel i tok, blesing i stap long man husat bilip na hop bilong em i stap long Bikpela, na tok nogut ken stap antap long man husat bilip bilong em em i givim long narapela man. Klia tru, yumi yusim gut save moa taim yumi putim olgeta bilip bilong yumi long God I Gat Olgeta Strong moa long man. Long wanpela, i no oltaim yu inap putim bilip long narapela man olsem yu, maski sapos dispela man em klostu tru long bel bilong yu o sapos dispela man em nambawan pren tru bilong yu, bikos olsem yu tasol, i gat sampela taim narapela man olsem yu i no strong na em ken kisim bagarap.

Sampela taim, ol man stret husat yu givim ona long ol na yu kaunim ol pren husat yu putim bilip long en, ol tu ol dispela husat husat bai putim yu long han bilong birua. Tru tru, Bikpela Jisas Kraist bin bungim pasin bilong putim long han bilong birua long wanpela husat Em bin kaunim olsem pren, Judas Iskariot.

Olsem rait i stap pinis long Sam 41:9,

Yes, gutpela pren bilong mi yet i bin litimapim lek bilong em yet bilong birua long mi. Mi bin bilip long em na em i bin kaikai sampela long bret bilong mi.

Bikpela Jisas Kraist bin stap wanpela pren husat i gat pasin bilong laikim tru na pasin bilong i no tingim Em Yet, inap long Em bin givim dispela hap bret i bilong Em Yet i go long Judas Iskariot. Tasol maski em olsem, Judas bin putim yet Bikpela long han bilong birua.

Tru dispela samting i save kamap bikos oltaim i gat dispela sans olsem dispela man long husat yu bin putim bilip bilong yu, em bai tanim na birua long yu. Tasol dispela bai no kamap long God. Em bai no inap putim long han bilong birua ol husat i putim bilip bilong ol long Em. Olsem na Baibel i tok “i gat blesing” long ol husat i gat bilip long God bikos Em i inap tru long bilip long en.

Yumi inapt ok olsem ol man husat i no putim bilip long God i no save long Em tru tru. Ol i no save long ol pasin bilong Em. Ol i no save long laik bilong Em. Ol i no save long wanem samting Em i laikim ol bai mekim. Sapos ol save, klia tru ol bai putim bilip long Em na long ol tok bilong Em, na ol bai holimpas yet ol tokaut na ol promis bilong Em, bikos God i stap tru long ol tok bilong Em na Em i save inapim olgeta wan wan promis bilong Em.

Wanpela bilong ol strongpela tok, dispela i karim wantaim em wanpela promis i kam long God bilong strongim tru bilip, em stap long rait long Hibru 13:5, dispela i tok,

Larim pasin bilong yupela i no ken gat pasin mangal. Na yupela i mas tok em inap long wanem kain samting yupela i gat. Long wanem, Em i bin tok, Mi bai i no inap lusim yu, o givim baksait long yu.

Noken toktok agens na mangalim wanem samting ol narapela i gat, tasol God laikim olsem yumi amamas long wanem samting yumi gat. Na taim yumi bihainim wanem samting God laikim olsem yumi mekim, yumi bai pilim inapim bilong promis bilong Em, “Mi bai i no inap lusim yu, o givim baksait long yu.”

Taim God bin tokim yumi olsem yumi noken gat pasin mangal na yumi amamas long wanem samting yumi gat, olsem Em bin skulim yumi olsem noken stil na noken mekim trikpasin tasol hatwok bilong kisim mani long pasin beltru. Dispela stret em wanem samting mi bihainim long laip bilong mi.

Bipo mi bin stat long ministri yet, mi bin wok pinis long kisim mani bilong baim ol nid bilong mi yet na ol nid bilong ol husat stap klostu tru long bel bilong mi. Inap long nau, taim mi go pas pinis long wanpela lotu lain long planti kantri, mi hatwok yet bilong kisim mani long wanpela pasin i beltru na i gat ona. I no olsem ol narapela pritsa, mi no bin mekim tok bilong God wanpela samting bilong baim, na mi no bin yusim lotu wanpela kain bisnis. Mi no save mangalim ol mani samting bilong ol narapela man, na mi no save yusim trikpasin long olgeta samting mi mekim. Em minim olsem, mi stap laip bilong bihainim laik bilong God.

Nau mi gat 74-pela krismas pinis, tasol, mi no tingim wanpela taim long laip bilong mi we mi bin sot o stap hangre, wanpela pruf olsem tru God i no lusim o givim baksait long ol husat i stap yet long ol skul tok bilong Em.

Dispela poin mi traim long poinim em dispela: Em pasin bilong yumi bilong bihainim God, dispela givim sans long pilim Em long ol laip bilong yumi, olsem Em bai no lusim o givim baksait long yumi. Na taim yu pilim dispela, yu bai putim bilip long God moa.

1 Jon 5:14 i tok,

Na dispela em i dispela strongpela bilip yumi gat insait long Em, long, sapos yumi askim wanpela samting bilong bihainim laik bilong Em, Em i harim yumi. 

Yumi bilip strong olsem God bai harim yumi sapos yumi askim Em long ol dispela samting i bihainim laik bilong Em. Na Em bai harim yumi sapos yumi inapim ol tok strong bilong God, ol tok helpim bilong Em, na ol skul tok bilong Em. Olsem na, sapos yupela harim ol man i tok olsem ol bin lusim bilip bilong ol long God bikos Em no harim ol prea bilong ol, em minim wanpela samting tasol. Ol stap ol man bilong sakim tok long God.

Tingim oltaim. God i no save lusim ol husat i save bihainim Em, na Em bai no larim ol long lusim bilip bilong ol long Em.

Tok Lukaut: Ol lain bilong tanim tok bilong mipela ol i lukaut na yusim gut tru save bilong ol taim ol i bin tanim dispela blog i go long Tok Pisin. Tasol, ControversyExtraordinary.com i no tok olsem olgeta infomesen ol i bin tanim i no gat asua bikos long sampela ol samting. Taim i gat sampela asua namel long rait i nambawan tru i stap long tok Inglis na rait ol i bin tanim long Tok Pisin, rait i nambawan tru i stap long tok Inglis i winim narapela oltaim.

Wanem Ol Samting i No bilong Laikim Tru long Dispela Graun bilong Winim Laikim Tru bilong God

1 Jon 2:15 i givim wanpela strongpela tok stret long ol Kristen, planti taim ol husat i kisim ves long bodi sait, ol i gat tingting kranki long em. Em i tok,

No ken laikim tru dispela graun, o ol dispela samting i stap long dispela graun. Sapos wanpela man i laikim tru dispela graun, laikim tru bilong Papa i no stap insait long em.

Ol i askim, “Olsem wanem ol inap long i no laikim tru dispela graun taim ol i stap long dispela graun na olgeta man husat i dia long ol tu i stap long dispela graun?”

Ples klia, ves i no toktok long dispela. Tru, yumi mas laikim tru ol papamama na ol narapela memba bilong ol famili bilong yumi, ol pren bilong yumi, ol narapela olsem yumi, na tu ol birua bilong yumi. Tasol i gat ol samting stret long dispela graun yumi tambu long laikim tru, na taim yumi laikim tru ol, em bai minim olsem laikim tru bilong Papa i no stap long yumi. Wanem ol dispela samting?

1 Jon 2:16 i tok,

Long wanem, olgeta samting i stap long dispela graun, aigris bilong bodi, na aigris bilong ol ai, na hambak bilong laip, i no bilong Papa, tasol em i bilong dispela graun. 

Jon bin soim tripela samting long dispela graun yumi noken laikim tru bikos ol i no kam long Papa. Ol i olsem aigris bilong bodi, aigris bilong ol ai, na hambak bilong laip. (John pointed out three things in the world that we should not love because they are not from the Father. They are the lust of the flesh, the lust of the eyes, and the pride of life.) Em minim olsem, yumi noken larim aigris bilong bodi na aigris bilong ol ai i winim yumi, olsem lukim ol pornographic video (vidio i soim ol man na meri i mekim ol sem pasin), ritim ol pornographic material (ol samting i soim ol man na meri i mekim ol sem pasin), spai long ol hol na baret long bet na toilet bilong narapela, amamas tumas long ol laik nogut na sem pasin, na traim soim laik long bodi bilong wanpela husat i no marit long yumi. Ol dispela em sampela bilong ol samting long dispela graun yumi noken laikim tru bikos ol i no bilong Papa.

Olsem aigris bilong bodi na aigris bilong ol ai, hambak bilong laip tu i no kam long Papa, olsem na, yumi noken laikim em tru tu. Tasol, nau, yumi lukim planti man husat i hambak long laip bilong ol, long stap bilong ol long sosaiti, long ol mani samting na pawa bilong ol, na long namba bilong ol wantaim ol man i gat biknem.

Ol i toktok long hambak antap long ol samting bilong ol yet na hambak ples klia. Ol i luksave long ol yet olsem gutpela olgeta na antap olgeta, olsem na, ol i no save kisim moa ol tingting na ol tok strong long ol narapela, maski ol dispela tingting i gutpela tru, moa yet sapos ol i kam long ol lain wantaim husat ol i resis.

Dispela i save kamap long ol politisen na ol ofisa bilong gavman. Ol i no sapotim na wok wantaim wanpela narapela, tasol planti taim yumi save lukim ol i tok pait nating, sapos ol i no tok agens na birua long sampela ol wok na ol tingting, i no long ol samting i no stret bilong ol, tasol bikos ol i kam tasol long wanpela husat i bilong narapela political party (grup bilong ol politisen). Olsem na, i no gat bel isi na i gat ol bruk long planti kantri nau.

Sapos ol no bin kam long Papa, ol dispela samting long dispela graun i kam long husat?

Jems 3:16,15 i tok, 

16 Long wanem, we mangal tingting na strongpela pait i stap, i gat pasin paul i stap na olgeta wan wan wok nogut. 

15 Dispela save tru i no kam daun long antap, tasol em i samting bilong dispela graun, em i samting bilong bihainim bodi, na em i samting bilong ol spirit nogut.

Ol i kam long Satan. Tru tru, yumi inap toktok long sait bilong olgeta longlong samting long dispela graun, olsem aigris bilong bodi, aigris bilong ol ai, pornography (wok bilong soim ol sem pasin long piksa, video na ol narapela rot), pamuk pasin bilong kisim mani, pasin bilong mangalim pawa, olgeta bilong ol i kam long Satan. Long dispela as, ol Kristen i tambu long laikim ol tru.

Tasol i no tambu long yumi laikim tru ol papamama, ol bratasusa, ol pikinini, ol pren na ol narapela olsem yumi, na ol birua bilong yumi tu. Tru, God i tok strong long ol Kristen long laikim tru ol. Tasol, tru, antap long olgeta narapela samting, yumi mas laikim tru God.

Tok Lukaut: Ol lain bilong tanim tok bilong mipela ol i lukaut na yusim gut tru save bilong ol taim ol i bin tanim dispela blog i go long Tok Pisin. Tasol, ControversyExtraordinary.com i no tok olsem olgeta infomesen ol i bin tanim i no gat asua bikos long sampela ol samting. Taim i gat sampela asua namel long rait i nambawan tru i stap long tok Inglis na rait ol i bin tanim long Tok Pisin, rait i nambawan tru i stap long tok Inglis i winim narapela oltaim.

As Tingting Nogut Bilong Wanem Sampela I Bilip Kraist I No God

Ating i gat wanpela tok tru long dispela tok bilong Iglesia ni Cristo (Sios bilong Kraist) bilong Manalo (INCM) olsem Bikpela Jisas Kraist i no moa long wanpela man tasol? Pastaim, yumi ken tingim dispela tok bilong Aposel Jon long sait bilong Em.

1 Jon 5:20-21 i tok,

20 Na yumi save long Pikinini Man bilong God i kam pinis, na Em i bin givim yumi wanpela gutpela save, inap long yumi ken save Em husat i tru, na yumi stap insait long Em husat i tru, yes, insait long Pikinini Man bilong Em Jisas Kraist. Dispela em i God tru, na laip i stap gut oltaim oltaim. 

21 Ol liklik pikinini, holimpas yupela yet longwe long ol piksa bilong god giaman. Amen.

Dispela ves stret em wanpela bilong planti ves ol minista bilong INCM i wok long paulim bilong mekim tok bilong ol i luk orait, olsem Bikpela Jisas Kraist i no wanpela God, tasol wanpela man tasol. Ol traim long mekim em luk olsem dispela trupela God ves 20 i kolim em Papa.

Tasol, sapos yumi bai skelim em dip moa, trupela God na laip stap oltaim oltaim ves i toktok long en em wanpela husat bin kam long dispela graun, wanpela husat bin givim long ol, ol aposel, gutpela save. Yu no inap yusim dispela long Papa bikos Em no bin kam hia long bodi sait. I no gat tupela tingting, em i toktok long Pikinini Man bilong Em, Bikpela Jisas Kraist. Em i “God tru na laip i stap gut oltaim oltaim.”

Bilong wanem Jon i givim dispela strongpela tok “holimpas yupela yet longwe long ol piksa bilong god giaman” long ves 21? Em bikos hia long dispela graun, i gat planti piksa bilong god giaman o ol god giaman. Tasol dispela Wan husat bin kam hia, dispela Wan husat bin givim gutpela save long ol, olsem ol aposel tok, em i God tru na laip stap oltaim oltaim. Na dispela em Bikpela Jisas Kraist. Tingim olsem dispela “God tru” long Inglis dispela hap tok “the” i go pas long em, “the true God and eternal life” i minim em toktok long wanpela stret.

Bilong pruvim moa olsem dispela “laip stap oltaim oltaim” em Bikpela Jisas Kraist, 1 Jon 1:1-2 i tok,

1 Dispela samting i stap long stat, dispela mipela i bin harim, dispela mipela i bin lukim wantaim ol ai bilong mipela, dispela mipela i bin lukluk long en, na ol han bilong mipela i bin holim, bilong Tok bilong laip. 

2 (Long wanem, dispela laip i kamap ples klia, na mipela i bin lukim, na stap witnes, na soim long yupela dispela laip i stap gut oltaim oltaim, dispela i stap wantaim Papa, na i kamap ples klia long mipela,)

Dispela “laip stap oltaim oltaim” bin stap wantaim Papa, na em bin kamap ples klia long ol aposel bikos em bin kam hia. Klia tru, em toktok long Bikpela Jisas Kraist. Dispela wanpela tok tru bilong Baibel, ol minista bilong INCM i no inap rausim o tekewe long Baibel.

Nau, taim Kraist bin kam hia long dispela graun, dispela em wanem samting Papa bin tokim Em:

 Hibru 1:8 i tok,

Tasol long Pikinini Man Em i tok, Sia king bilong Yu, O God, i stap oltaim oltaim na oltaim. Wanpela stik king bilong stretpela pasin em stik king bilong kingdom bilong Yu.

Gen, ol minista bilong INCM i paulim tu dispela ves. Long tingting bilong ol long daunim stap bilong Bikpela Jisas Kraist long stap bilong wanpela man nating, ol bin senisim “Sia king bilong Yu, O God,” long “Sia king bilong Yu em God”, dispela i kamapim wanpela kain tingting i daunim tru stap bilong God. Ol bin bringim God long wanpela kain stap daunbilo, daunbilo tru. Ol bin mekim Em wanpela sia king we yu inap sindaun long en. Ating dispela em pani, a?

Long ves yumi kolim bipo, Papa Em dispela wan husat i toktok, na Em bin kolim Pikinini Man bilong Em olsem God. Ating yu bai agensim toktok bilong Papa, o? Dispela em tok tru. Bikpela Jisas Kraist Em God bikos Em i Pikinini Man bilong God. Em bin kam long bel bilong Papa. Papa bin kamapim Em. Dispela tok tru em sampela samting ol minista bilong INCM i no inap long kisim, olsem Papa bin kamapim dispela wanpela God Em bin kamapim. Tasol tok nogat bilong ol i no inap senisim tok tru, olsem Bikpela Jisas Kraist Em dispela wanpela God Em bin kamapim. Olsem rait i stap pinis long ol rait long Grik, Em monogenes theos.

Tru tru, maski sapos i gat planti pruf bilong pruvim pasin bilong Bikpela Jisas Kraist bilong stap God, ol aposel tu bin stap witness olsem, “Dispela em i God tru, na laip i stap gut oltaim oltaim,” na Papa tu “…Tasol long Pikinini Man Em i tok, Sia king bilong Yu, O God, i stap oltaim oltaim na oltaim,” mi gat tupela tingting sapos ol dispela minista bilong INCM bai lusim bilip bilong ol moa long handet yia olsem Bikpela Jisas Kraist Em wanpela man tasol.

Yumi no inap mekim wanpela samting long sait bilong em. Tru yumi no inap abrusim olsem tru i gat ol man husat bai no luksave long pasin bilong Kraist bilong stap God, i no long wanpela gutpela as tingting i bihainim Baibel, tasol i kam long bikhet pasin na pasin bilong strongpela het. Tasol bikhet pasin na pasin bilong strongpela het bai bringim ol we?

 Tok Lukaut: Ol lain bilong tanim tok bilong mipela ol i lukaut na yusim gut tru save bilong ol taim ol i bin tanim dispela blog i go long Tok Pisin. Tasol, ControversyExtraordinary.com i no tok olsem olgeta infomesen ol i bin tanim i no gat asua bikos long sampela ol samting. Taim i gat sampela asua namel long rait i nambawan tru i stap long tok Inglis na rait ol i bin tanim long Tok Pisin, rait i nambawan tru i stap long tok Inglis i winim narapela oltaim.

Rausim Ol Toktok long Sait bilong Kam Bek bilong Kraist Wantaim Gutpela Skelim na Isi Stretpela Skelim

Iglesia ni Cristo (Sios bilong Kraist) bilong Manalo em wanpela bilong ol dispela lotu i bilip olsem, taim Bikpela Jisas Kraist i kam bek, dispela graun bai kuk long paia pinis. Tru tru, long wanpela bilong ol brotkas bilong ol long tivi, Michael Sandoval, wanpela minista bilong INC bilong Manalo, em bin tok win nabaut ples klia olsem taim Kraist bosim kingdom wan tausen yia long dispela graun, dispela bin kamap het tok bilong planti bilong ol bung bilong kongrigesen bilong mipela, em i no gat rot liklik long kamap bikos, olsem em tok, taim Bikpela Jisas Kraist kam bek, dispela graun bai kuk long paia na bagarap olgeta pinis. Na bikos em bai bagarap olgeta pinis, bai i no gat wanpela hap bilong Kraist bilong bosim moa. 

Ples klia, em bin traim long resis long wanem samting mi skulim ol brata na ol susa bilong mipela insait long Sios bilong God Intenesenel, sampela samting mi bin kisim long buk bilong Revelesen, dispela i tok olsem taim Kraist kam bek, Em bai kirapim gen ol husat bin dai insait long Em na ol, wantaim ol wok manmeri bilong Em i beltru, bai bosim dispela graun wantaim Em wan tausen yia (Revelesen 20:5-6). Mi tingting planti bilong wanem em i agensim sampela samting i stap pinis ples klia long rait insait long Baibel. 

Em stap ples klia olsem pasin bilong em bilong agensim toktok bilong mi, em kamap taim em no gat save long ol samting hait bilong Baibel na ol tok profet, mipela insait long Sios bilong God Intenesenel i save na klia maski mipela stap ol liklik lain, i no long hatwok bilong mipela yet tasol long holi stia bilong Holi Spirit.

Em i no tru olsem dispela graun bai kuk long paia pinis, taim Bikpela Jisas Kraist kam bek. Maski yumi no tok nogat long samting tru olsem God bin makim dispela samting long kamap, tasol em bai no kamap taim Kraist kam bek. Olsem Baibel i tok, taim Bikpela Jisas Kraist kam bek, Em, wantaim ol seint bilong Em husat Em bai mekim ol pris, bai bosim dispela graun wan tausen yia. Olsem na, dispela graun stap yet. Na wantaim dispela taim bilong wan tausen yia, yumi ken hop olsem ol bai inap autim Gutnius bilong kisim bek antap long dispela graun olgeta taim i no gat wanpela inap pasim em bikos, insait long dispela taim, Satan bai stap kalabus. Tasol, bihain long taim bilong wan tausen yia, ol bai lusim em long kalabus bilong em.

7 Na taim dispela wan tausen yia i pinis, ol bai lusim satan ausait long kalabus bilong em, 

8 Na em bai go ausait bilong giamanim ol kantri husat i stap long fopela namba foa hap bilong dispela graun, Gok na Megok, bilong bungim ol wantaim bilong pait, namba bilong husat i olsem wesan bilong solwara.

Long pinis bilong wan tausen yia, taim ol lusim Satan pinis long kalabus bilong em, taim em save olsem em gat sotpela taim tru i stap, em bai wok strong dabol long giamanim ol kantri long fopela kona bilong dispela graun. Tingting long em tasol. Olsem wanem Satan inap go nabaut long fopela kona bilong dispela graun sapos dispela graun i no stap moa? Narapela long dispela, bai i gat wanpela Armagedon long kamap. Gen, olsem wanem dispela las pait i kamap sapos, taim Bikpela Jisas Kraist kam bek, dispela graun bai bagarap olgeta pinis? Ating yupela lukim longlong pasin bilong Michael Sandoval na kranki tingting bilong ol toktok bilong em?

Tru tru, em nidim isi stretpela skelim na liklik gutpela skelim long klia olsem taim Bikpela Jisas Kraist i kam bek, dispela graun bai no kuk yet long paia bikos Em bai bosim yet em wan tausen yia. 

Ples klia, ol minista bilong INC bilong Manalo, moa yet Michael Sandoval, ol sot long stretpela skelim na gutpela skelim. Sapos ol gat ol dispela, ol toktok bilong ol i no bin agensim tok bilong Baibel, na ol i no bin soim olsem ol i no gat save na ol i no gat gutpela tingting long tivi long ai bilong olgeta kantri. Kain pasin bilong tingting bilong ol i pruvim tasol olsem ol i no gat save liklik long sait bilong dispela taim i laik kam Bikpela Jisas Kraist na ol seint bilong Em i bosim kingdom hia long dispela graun.

Tasol mi no inap blemim ol olgeta bikos, klia tru, ol tisa bilong ol i no bin skulim ol wanpela samting long sait bilong buk bilong Revelesen, ating bikos ol tu i no bin klia long dispela buk stret bilong Baibel. Ol i tarangu tru! Liklik samting tru ol minista bilong INC ken mekim em long daunim ol yet inap long tokaut olsem ol i no gat save, mobeta long hambak nabaut na giaman olsem ol i save gut long sait bilong ol tok tru bilong Baibel olsem ol tok profet. Tru tru, taim ol hambak nabaut na giaman moa, em kamap ples klia moa olsem ol i no gat gutpela save. Ol dispela tok stret i kam ausait long ol maus bilong ol, ol dispela i kamapim ol ples klia taim ol i no save. Na mipela sori tru long ol, moa yet olgeta long ol brata na ol susa bilong ol long bilip, husat ol i stiaim i go long bagarap olgeta. God i ken sori long ol dispela manmeri.

Tok Lukaut: Ol lain bilong tanim tok bilong mipela ol i lukaut na yusim gut tru save bilong ol taim ol i bin tanim dispela blog i go long Tok Pisin. Tasol, ControversyExtraordinary.com i no tok olsem olgeta infomesen ol i bin tanim i no gat asua bikos long sampela ol samting. Taim i gat sampela asua namel long rait i nambawan tru i stap long tok Inglis na rait ol i bin tanim long Tok Pisin, rait i nambawan tru i stap long tok Inglis i winim narapela oltaim.

Wanem Ol Samting bilong Hop long En long 1,000 Yia Taim bilong Kraist bilong Stap King

Noken bilipim wanpela pritsa o wanpela lotu husat bai tok olsem kam bek bilong Bikpela Jisas Kraist em i makim pinis de bilong kot na bagarap olgeta bilong dispela graun. Dispela i no tok tru. Yes, Bikpela Jisas Kraist bai kam bek, tasol i no long jasim olgeta man na bagarapim dispela graun olgeta wantu, bikos i gat narapela taim God i bin makim bilong mekim ol dispela samting.

Taim Bikpela Jisas Kraist i kam bek, Em bai kirapim gen, i no olgeta daiman tasol ol husat bin dai insait long Em tasol. Baibel i kolim dispela olsem nambawan kirap bek. Na bihain, ol husat Em bin kirapim na ol wok manmeri bilong Em i beltru husat stap laip yet long dispela taim, Em bai kisim i go antap long ol klaut bilong bungim Em long skai. Olsem rait i stap pinis long 1 Tesalonaika 4:16-17, 

16 Long wanem, Bikpela Em Yet bai kam daun long heven wantaim wanpela singaut, wantaim nek bilong nambawan ensel, na wantaim biugel bilong God. Na ol daiman insait long Kraist bai kirap bek pastaim. 

17 Nau yumi husat i stap laip na stap yet God bai kisim i go antap wantaim, wantaim ol, long ol klaut, bilong bungim Bikpela long skai. Na olsem tasol yumi bai stap oltaim wantaim Bikpela.

Ol husat bai stap insait long nambawan kirap bek, God i kaunim olsem ol i gat blesing bikos namba tu dai i no gat pawa moa antap long ol. God bai mekim ol kamap ol pris, na wantaim Kraist, ol bai stap king long dispela graun 1,000 yia.

 REVELESEN 20:5-6

5 Tasol olgeta arapela daiman i no kisim laip gen inap long dispela wan tausen yia i pinis. Dispela em i namba wan kirap bek. 

6 Blesing na pasin holi i stap long em husat i gat hap insait long namba wan kirap bek. Long kain man olsem namba tu dai i no gat pawa, tasol ol bai stap ol pris bilong God na bilong Kraist, na ol bai bosim kingdom wantaim Em wan tausen yia.

Em i minim olsem, i gat tupela kirap bek bilong ol daiman i laik kamap. Namba wan kirap bek em bilong ol husat bin dai insait long Kraist tasol, na dispela bai kamap taim Bikpela Jisas Kraist i kam bek. Tasol namba tu kirap bek em bilong olgeta daiman husat i no stap long namba wan kirap bek, na em bai kamap bihain long taim bilong 1,000 yia. Olsem na, i gat spes bilong 1,000 yia namel long namba wan na namba tu kirap bek bilong ol daiman. 

Taim olgeta daiman kirap, dispela em taim Bikpela Jisas Kraist bai jasim ol man stap laip na ol daiman wantaim. Baibel bin toktok long sait bilong Kraist olsem jas bilong ol man stap laip na ol daiman wantaim.

1 PITA 4:5

Husat bai givim stori long Em husat i redi long jasim ol man i stap laip na ol daiman.

Narapela ves i pruvim olsem Bikpela Jisas Kraist bai jasim ol man stap laip na ol daiman em i 2 Timoti 4:1, dispela i tok, 

Nau Holi Spirit i toktok klia, long ol taim bihain sampela bai lusim bilip tru, taim ol i givim ia long ol spirit bilong grisim, na ol skul bilong ol spirit nogut,

Taim bai kam Bikpela Jisas Kraist bai kamap ples klia na glori bilong kingdom bilong Em bai kamap ples klia. Tasol em bihain yet long 1,000 yia, taim Em bai mekim kot long ol man stap laip na ol daiman wantaim husat bin kirap long namba tu kirap bek.

Tru tru, Jon, long husat God bin givim ol dispela revelesen, em bin gat lukluk long de bilong kot. Em bin lukim tu olsem wanem ol bin tromoi Satan long raunwara paia na ston salfa.

REVELESEN 20:10 

Na satan husat i giamanim ol ol i tromoi i go long raunwara paia na ston salfa, we dispela animal na dispela giaman profet i stap, na ol bai gat traipela pen san na nait oltaim oltaim na oltaim. 

Bihain long dispela, Jon bin lukim tu wanpela bikpela waitpela sia king, na bipo long sia king bilong God, olgeta daiman husat bin kirap bek, ol bin sanap long pesim kot.

REVELESEN 20:11-12

11 Na mi lukim wanpela bikpela waitpela sia king, na Em husat i sindaun antap long en, long pes bilong husat dispela graun na heven i ranawe i go. Na i no gat ples bilong ol long stap. 

12 Na mi lukim ol daiman, man nating na bikman, i sanap long ai bilong God. Na ol i opim ol buk. Na ol i opim narapela buk, dispela em buk bilong laip. Na Em i jasim ol daiman ausait long ol dispela samting, dispela ol i bin raitim insait long ol buk, bilong bihainim ol wok bilong ol.

Olsem na, em klia nau olsem kam bek bilong Bikpela Jisas Kraist i no makim de bilong kot o bagarap olgeta bilong dispela graun, bikos ol dispela samting bai kamap bihain long taim bilong Em bilong stap king 1,000 yia. Yumi mas klia olsem kam bek bilong Bikpela Jisas Kraist i makim tasol stat bilong taim bilong Em bilong stap king long dispela graun.

Taim Bikpela Jisas Kraist i stap king antap long olgeta husat stap long dispela graun, yumi ken tingting tasol long dispela kain jastis, stretpela pasin na pasin holi bai i winim olgeta hap. Yumi ken hop tu olsem taim Kraist stap king, moa moa manmeri bai tanim bel, dispela i minim olsem moa moa manmeri bai kisim sans long kisim bek. 

Tok Lukaut: Ol lain bilong tanim tok bilong mipela ol i lukaut na yusim gut tru save bilong ol taim ol i bin tanim dispela blog i go long Tok Pisin. Tasol, ControversyExtraordinary.com i no tok olsem olgeta infomesen ol i bin tanim i no gat asua bikos long sampela ol samting. Taim i gat sampela asua namel long rait i nambawan tru i stap long tok Inglis na rait ol i bin tanim long Tok Pisin, rait i nambawan tru i stap long tok Inglis i winim narapela oltaim.

Stretim o Oraitim Sik: Giaman o Trupela?

Baibel i toktok long kain kain ol presen bilong spirit sait long Sios, na wanpela bilong ol em presen bilong stretim sik (1 Korin 12:4,9). Tru tru, Kristen Sios bilong namba wan handet yia bin kisim dispela presen, olsem na i gat ol aposel na ol memba bilong Sios bipo husat God bin yusim long oraitim ol manmeri husat i sik long bodi. Na inap long taim nau, presen bilong God bilong stretim sik i helpim yet lain manmeri bilong Em.

Sampela taim, stretim sik i kamap i no long wanpela wok bilong man tasol long ol strongpela prea tru. Long wanpela, God i ofaim stretim sik long ol husat i prea strong long em. Mi yet mi save long sampela brata na susa insait long Sios husat ol dokta bin painimaut ol sik bilong ol taim sik bilong ol i nogut olgeta pinis, tasol ol narapela bin gat ol sik ol ken pasim i go long ol narapela. Tasol long ol strongpela prea tru long God I Gat Olgeta Strong, ol dispela lain bin inap long stap laip long hapsait bilong dispela mak ol dokta bin makim long ol. I gat ol lain tu husat, bikos ol sot long mani, ol bin tok nogat long ol dokta katim ol na ol bin makim long hausik salim ol go bek long haus, tasol long ol prea na autim askim i beltru tu, God bin skruim sampela moa ol yia long ol laip bilong ol.

Insait long Sios bilong God Intenesenel, wanem taim yumi karim pen long wanpela sik, namba wan samting mipela mekim em long brukim skru, prea na askim God long sori na wanem samting Em inap mekim. Mipela no save wokim wanpela ceremony o ritual. Mipela no save singim wanpela kain song ol kolim olsem incantation. Mipela prea strong tru tasol. Em bilip bilong mipela olsem God inap mekim moa long wanem samting ol medical specialist (dokta husat save gut tru long wanpela hap bilong bodi) inap mekim, na, olsem, Em inap mekim wanem samting ol dokta nambawan olgeta i no inap.

Planti ol pritsa nau i hambak olsem ol gat presen bilong stretim sik, olsem taim ol slipim han tasol long ol sikman, klia tru ol husat i gat sik bai kamap orait. Tru, dispela em wanpela pani toktok. Em isi long tok olsem ol gat presen bilong stretim sik, tasol pruvim em sampela samting ol bin fel long mekim.

Tru, mi bin lukim wanpela vidio bilong wanpela pritsa i no gat sem husat sapos long mekim wanpela pasin bilong wokim mirakel. Tasol em i no slipim han bilong em long sikmeri, em bin slipim fut bilong em long em. Em bin kamap ples klia olsem tru tru wok bilong mekim trupela stretim sik i no nambawan tingting bilong em. Em gat laik moa long kisim sans long sikmeri husat dai tumas long kisim orait bilong em. Em bin yusim namba bilong em olsem wanpela pritsa na dispela presen bilong stretim sik, em tok em gat, long mekim ol pasin bilong laik nogut, olsem vidio i soim.

Tru tru, meri long vidio bin karim pen long wanpela kain sik long overi. Tasol pasta bin mekim wanem? Taim em yusim fut bilong em, em bin tasim sem bilong meri. Ples klia em bin mekim sem pasin long meri. Baibel i no bin toktok long wanpela kain pasin bilong stretim sik olsem wanem samting dispela longlong pasta bin yusim. Em soim ples klia olgeta aigris na pasin bilong bihainim laik nogut, na, i no gat tupela tingting, dispela man i no bilong God, tasol bilong Satan.

Mipela, insait long Sios bilong God Intenesenel, i no save wokim kain ol longlong pasin na tu mipela no save tok olsem mipela inap oraitim ol man long olgeta kain sik bilong ol taim mipela slipim han tasol long ol. Mipela save prea long God long orait bilong Em bikos mipela bilip wantaim pasin beltru olsem em God husat i stretim sik, na bilip bilong mipela i sanap strong long wanem samting Em bin toktok long Eksodas 15:26, “…Long wanem, Mi stap BIKPELA na Mi oraitim yu.” Mipela putim bilip oltaim long ol toktok bilong Em na long bikpela sori bilong Em.

Tru, i gat presen bilong stretim sik God bin givim long Sios. Tru tru i gat sampela memba bilong Sios husat God bin givim dispela presen long ol, kain olsem, ol brata na ol susa bilong mipela husat wok olsem ol massage therapist (man bilong rabim bodi bilong stretim sik). Olsem ol massage therapist, ol inap oraitim ol hap bilong bodi i solap, stretim bek ol bagarap long bodi bilong ol man bilong pilai, oraitim ol masel taim ol i tait na strong, na mekim ol husat i gat pen long pilim orait, i no taim ol slipin han long ol, tasol long yusim kain kain strong bilong presa long dispela hap bilong bodi i bagarap o long rabim ol dispela hap taim ol yusim ol han bilong ol. Olsem na, long liklik rot bilong ol yet, ol i inap long oraitim sik tu.

Tasol maski wanpela man kisim orait bikos long ol prea na bikos long wanpela samting wanpela helt wokman bin mekim, bilip bilong mipela em olsem. God na Bikpela Jisas Kraist, em tupela husat i oraitim sik tru tru. Ol husat i gat presen bilong stretim sik , Papa na Kraist i yusim ol tasol tu long oraitim ol man. Tru, em i pawa bilong stretim sik bilong God na Bikpela Jisas Kraist, dispela i wokim ol samting bilong winim tingting. Em minim olsem, God na Bikpela Jisas Kraist, em ol man bilong stretim sik bilong yumi.

Tok Lukaut: Ol lain bilong tanim tok bilong mipela ol i lukaut na yusim gut tru save bilong ol taim ol i bin tanim dispela blog i go long Tok Pisin. Tasol, ControversyExtraordinary.com i no tok olsem olgeta infomesen ol i bin tanim i no gat asua bikos long sampela ol samting. Taim i gat sampela asua namel long rait i nambawan tru i stap long tok Inglis na rait ol i bin tanim long Tok Pisin, rait i nambawan tru i stap long tok Inglis i winim narapela oltaim.

Long Marit, o I No Long Marit: Toksave bilong God I Stap Long Rait Ken Stiaim Yu

God i gat laik long man long makim oltaim wanem samting i gutpela, stap yet long ol skul tok bilong Em, na bihainim ol pasin em i ken mekim na i tambu long mekim olsem Em bin lainim olsem na man ken stap wantaim wanpela kain laip i pulap long bel isi, i stap gut na i pulap long amamas. Tasol Em i no pulim strong man long mekim wanem samting Em laikim o banisim dispela fri rait bilong man long makim ol samting. Tasol, God i kamapim ples klia ol samting bilong winim na helpim man bai kisim sapos em makim long bihainim laik bilong Em. 

Na olsem wanpela papa husat laikim ol samting gutpela olgeta tasol bilong givim long ol pikinini bilong em, God i no fel liklik long givim man ol toksave na ol tingting bilong Em, ol dispela em ken yusim olsem wanpela stia long makim ol samting na wokim tingting long laip, moa yet long sait bilong ol samting i no bilong pilai olsem painim man o meri bilong maritim na marit, kain olsem.

Marit em i wanpela sois God i givim long olgeta wan wan man na meri. Ol husat laik kamapim wanpela famili bilong ol yet, oltaim ol ken makim long marit, tasol ol husat laik bihainim wanpela laip bilong stap isi, fri long bel wari na bilong bihainim God, oltaim ol ken makim long stap i no marit. Tasol sapos ol makim long marit, em bikpela samting olsem ol kisim tingting pastaim long ol toksave bilong God i stap long rait bilong Baibel long sait bilong dispela samting olsem na ol bai no mekim wanpela asua ol bai bel sori long en bihain.

Long sait bilong meri, Baibel i tok olsem, sapos em laikim wanpela laip wantaim ol wari na ol wok tru i no planti, na, sapos em laikim wanpela kain laip i no gat samting bilong pulim tingting long narapela samting long wok bilong em long God, em mobeta long em i no marit. Bilong wanem? Bikos taim em marit, em wanpela kain wok bilong mekim 24 aua na 7 de long wik. Em bai nidim bikpela hap tru bilong taim bilong em. Na taim em marit pinis, em bai no inap moa long givim inapt aim olsem em laikim long wokim wok long God. Tingting bilong em bai pait namel long ol wok tru bilong em long God na ol wok tru bilong em long man na ol pikinini bilong em.

I no olsem wanpela meri i no marit husat i tingting planti taim long ol samting long sait bilong pasin bilong bihainim God na pasin holi, ol wari bilong dispela graun i bagarapim sindaun bilong wanpela maritmeri. Olsem na, inap long kain ol samting i no pulim tingting bilong em long narapela samting, Baibel i givim tingting olsem em ken stap meri i no marit.

1 KORIN 7:32-35 i tok,

32 Tasol mi gat laik long yupela i no ken wari. Em husat i no marit i wari long ol dispela samting i bilong Bikpela, long em i ken amamasim bel bilong Bikpela olsem wanem. 

33 Tasol em husat i marit i wari long ol dispela samting i bilong dispela graun, long em i ken amamasim bel bilong meri bilong em olsem wanem. 

34 Maritmeri na meri i no bin slip wantaim man i narakain tu. Meri i no marit i wari long ol samting bilong Bikpela, inap long em i ken stap holi long bodi na long spirit wantaim. Tasol meri husat i marit i wari long ol samting bilong dispela graun, long em i ken amamasim bel bilong man bilong em olsem wanem. 

35 Na dispela mi toktok bilong helpim yupela yet. I no long mi ken tromoi wanpela trap antap long yupela, tasol bilong dispela samting i fit tru, na long yupela i ken givim ia long Bikpela taim i no gat arapela samting i kisim tingting. 

Long planti ol hauslain, man i kisim wok olsem bilong painim ol samting bilong helpim famili, tasol em i meri husat i kisim hap bilong wok i hevi moa. Em dispela wan husat i kisim bel na karim bebi long bel bilong em long nainpela mun. Bihain long nainpela mun, em i karim pikinini. Na taim em karim pikinini, laip bilong em ken kisim bikpela bagarap. Na bihain long karim pikinini, em i givim susu na was long pikinini bilong em long san olgeta, i go i go. Tru tru, ol dispela wok wanpela mama mas inapim i no gat pinis. Yumi no toktok yet long ol wok tru bilong em olsem meri long man bilong em na meri bilong lukautim haus bilong ol.

Wantaim hevi wok bilong em olgeta wan wan de, klia tru em bai kisim taim long makim taim bilong yusim long wokim wok long God. Tasol sapos em bai makim long bihainim toksave bilong God, sapos em bai makim long stap yet meri i no marit, em bai kamap fri long wanpela kain laip i pulap long hevi na em bai inap long bihainim God fri.

Dispela toksave stret bilong God, Em givim tingting tu long dispela long man.Sapos em gat laik long mekim em yet fri long ol trabel bilong stap het bilong famili, kain olsem kisim mani bilong baim ol skul fi bilong ol pikinini bilong em, baim milk na bambam bilong bebi, nab aim rent, ol dinau, na ol narapela samting bilong peim bilong haus. Na sapos em gat laik long bihainim Bikpela wantaim bel olgeta, em gutpela olgeta olsem ems tap yet wanpela man i no marit, olsem Aposel Pol.

Sampela taim, i gat ol nambawan lain olsem Aposel Pol, husat God bin makim long wokim wanpela nambawan wok. Long sait bilong Pol, em bin larim laik bilong God na i no sois bilong em yet bilong stap nambawan long laip bilong em. Maski i no tambu long ol aposel long marit, Aposel Pol bin makim long stap yet i no marit bikos em gat laik long inapim wok na ol wok tru bilong em wantaim pasin bilong beltru moa na i no gat wanpela samting i pasim em. Em gat laik tu long yusim olgeta laip bilong em long wokim wok long Bikpela, dispela em no bin inap long mekim sapos em gat meri na ol pikinini bilong lukautim. 

GALATIANS 1:13-15

13 Long wanem, yupela i bin harim stori long pasin bilong mi long taim bipo long lotu pasin bilong ol Ju, olsem long mi bin givim hevi long sios bilong God i kalapim skel, na mekim dispela i stap pipia.

14 Na long lotu pasin bilong ol Ju mi winim antap long planti ol wanmak stret bilong mi long kantri bilong mi yet, taim mi hatwok planti moa yet long bihainim ol kastam bilong ol tumbuna papa bilong mi. 

15 Tasol taim em i amamasim bel bilong God, husat i brukim mi i lusim bel bilong mama bilong mi, na singautim mi long marimari bilong Em,

Tru, taim Pol bin stap yet long bel bilong mama bilong em, God bin makim em bipo pinis long kamap aposel. Na taim dispela taim bilong makim em wanpela aposel bin i kam, wantaim amamas em bin givim em yet long laik bilong God.

Olsem Aposel Pol, God tu bin makim Jeremaia long narapela nambawan wok long taim em stap yet long bel bilong mama bilong em. God bin makim Jeremaia long kamap wanpela profet i go long ol katri.

Tasol narapela long ol dispela samting i kamap wan wan taim, ol man na meri stap fri long makim dispela kain laip ol laikim. Ol stap fri long marit, sapos ol laikim. Ol stap fri tu long stap yet i no marit sapos dispela em sois bilong ol. Na sapos ol wokim tingting long marit, em gutpela samting olgeta olsem ol skelim ol toksave na ol tingting bilong God pastaim.

Pastaim tru, em bikpela samting olsem man, o meri, em inap long makim rait man o meri husat bai kamap poro bilong em long taim bilong laip bilong em. Ol mas klia tru olsem ol i laikim tru rait man o meri. Bilong wanem? Bikos Satan i kirapim bel bilong ol man na meri tu long laikim tru, tasol em kirapim bel bilong ol long laikim tru rong man o meri, wanpela husat i marit pinis tu. Noken bilipim tok bilong ol narapela olsem taim Kupid sutim yu wantaim dispela spia bilong em i go stret long bel bilong yu, laikim tru bai aipasim yu na yu bai laikim tru wanpela man o meri husat marit pinis tu. Em no gutpela tingting. Nambawan, Kupid i no trupela. Em stap long ol tumbuna stori nating tasol. Taim yu mekim wanpela man o meri laikim tru wanpela husat i marit pinis, em i no wok bilong Kupid tasol bilong Satan. Na sapos yu givim yu yet long Satan taim em skrapim bel bilong yu, yu bai kamap man o meri bilong bagarapim wanpela famili na man o meri bilong mekim pasin nogut.

God i no gat laik tu olsem yu bai maritim wanpela man bilong kros hariap. Tru tumas, God i no gat laik tu olsem yu bai pas wantaim o yu prenim wanpela husat i save belhat kwik o wanpela husat i kros o belhat oltaim. Em gat laik olsem yu stap longwe long ol dispela kain man na meri bikos ol ken pulim yu long bihainim pasin nogut.

PROVEP 22:24-25 i tok, 

24 No ken kamap pren wantaim belhat man. Na no ken go wantaim man bilong belhat tru. 

25 Nogut yu lainim ol pasin bilong em na kisim trep i kam long tewel bilong yu.

Tru tru, dispela kain pasin i no stap long ol man tasol bikos i gat ol meri tu husat save kros hariap na oltaim ol i pait na tok pait wantaim ol narapela. 

PROVEP 21:19

Em i mobeta long stap long ples i no gat man, long stap wantaim wanpela meri bilong pait na belhat.

Olsem na, sapos yu lukim olsem gelpren bilong yu em no wanbel wantaim yu planti taim na oltaim em tok pait wantaim yu, mobeta yu lusim em. Sapos nogat, yu bai no painim bel isi long laip sapos em kamap meri bilong yu. Na yu no inap lusim o rausim em nating taim em save skrapim bel bilong yu na em hatpela long stap wantaim em.

Em agens long laik bilong God olsem man na meri bai bruk. Marit mas stap oltaim. Em mas sanap strong long traim bilong taim na em mas sanap strong long olgeta kain hevi. Inap long ol dispela kamap, sindaun bilong man na meri mas sanap antap long trupela laikim tru na long ol skul tok bilong God. Na man na meri husat i laik marit mas kisim save olsem sindaun bilong ol bai stap long taim bilong laip bilong ol na dai wan tasol inap brukim ol.

Sapos long ol narapela lotu, ol inap mekim wanpela marit kamap samting nating, insait long trupela Sios bilong God, marit em wanpela promis bilong laip na wanpela kontrak bilong marit i no inap lusim pawa bilong em. Em bai pinis tasol taim wanpela bilong tupela i dai.

Na bikos mipela insait long Sios bilong God Intenesenel i no tok orait long brukim marit, mipela lukluk pastaim olsem man na meri husat laik marit i laikim tru wanpela narapela tru tru, olsem ol i redi long mekim ol yet inap long wanpela narapela, taim yu tingim na skelim olsem tru ol bin kam long narakain narakain famili na ol bin go bikpela i no long wankain pasin, olsem ol i redi long pesim dispela ol salens na ol hevi i ken kam long rot bilong ol, na, olsem ol bai sanap wantaim wanpela narapela olgeta taim na ol bai stap beltru yet long wanpela narapela olgeta de bilong ol laip bilong ol. Na sapos ol hevi na ol pait i kamap long laip marit bilong ol, mipela helpim tu ol long lukautim marit bilong ol. Mipela helpim ol long stretim ol samting na ol toktok wantaim tok bilong God bikos em i laik bilong God olsem ol man na ol meri i stap wantaim inap long pinis.

Yumi inap tok olsem long olgeta samting mipela mekim na long olgeta wan wan sois na tingting mipela mekim, oltaim em bai helpim yumi sapos yumi bai gat stia na sapos yumi bai bihainim laik bilong God. Yumi inap tok tu olsem dispela rot i gat gutpela save moa bilong yusim fri laik bilong yumi o freedom of choice bilong yumi, em long makim long bihainim toksave bilong God, maski em long marit o long ol narapela sait bilong laip. Tingim oltaim, God i save wanem samting gutpela olgeta bai helpim yumi, na Em laikim samting gutpela olgeta tasol bilong helpim yumi.

Glori i go long God!

Tok Lukaut: Ol lain bilong tanim tok bilong mipela ol i lukaut na yusim gut tru save bilong ol taim ol i bin tanim dispela blog i go long Tok Pisin. Tasol, ControversyExtraordinary.com i no tok olsem olgeta infomesen ol i bin tanim i no gat asua bikos long sampela ol samting. Taim i gat sampela asua namel long rait i nambawan tru i stap long tok Inglis na rait ol i bin tanim long Tok Pisin, rait i nambawan tru i stap long tok Inglis i winim narapela oltaim.