Tok Tru bilong Baibel long Sait bilong Bon De bilong Kraist

December 25, 2020 0 Ol Toktok long Dispela

Klostu olgeta lotu husat i kolim ol yet Kristen, ol save wokim bikpela amamas tru long Krismas. Ol bilip olsem namba 25 de bilong Disemba em dispela de mama bin karim Bikpela Jisas Kraist taim Em bin soim Em Yet long bodi.

 Askim em olsem. Dispela bilip i gat sampela as bilong em long Baibel, o nogat? Na Kraist bin tok strong long ol Kristen long wokim amamas long dispela de, o nogat?

Long statim, pasin bilong wokim amamas long 25 Disemba o Krismas, em no stap long Gutnius. Em no wanpela tok strong bilong Kraist. Olsem na, sapos em no wanpela tok strong bilong Kraist na sapos em no stap long rait bilong Gutnius, ol Kristen i noken bihainim em.

Olsem em tok long 1 Korin 4:6, 

Na ol dispela samting, ol brata, mi gat long wanpela piksa mi putim i go long mi yet na long Apolos long tingim yupela. Inap long yupela i ken lainim long mipela long yupela i no ken tingim long ol man antap long dispela samting i stap long rait pinis, inap long i no ken gat wanpela bilong yupela i bikhet bilong wanpela i birua long narapela. 

Baibel i tok strong long yumi noken abrusim wanem samting stap long rait pinis. Em minim olsem bilip bilong yumi mas sanap strong long ol samting stap long ol Rait Holi pinis. Sapos ol no stap long rait, sapos ol i ol pasin tumbuna man i wokim tasol, ol Kristen i noken kisim o bihainim ol, maski ol i naispela tru na gutpela tru. Na bikos Baibel i no bin toktok liklik long sait bilong 25 Disemba olsem bon de bilong Kraist, noken mekim em wanpela hap bilong bilip bilong yu. Noken stap wanpela bilong ol bilien manmeri long dispela graun olgeta husat i bisi tumas long dispela de.

Yumi klia tru olsem mama i no bin karim Kraist long Disemba bikos long dispela mun, Betlehem, dispela hap we mama bin karim Em, ais wara i karamapim em.

 

Bilong bihainim stori bilong Man bilong Autim Gutnius Luk, long dispela nait mama bin karim Kraist, i gat ol wasman bilong sipsip long ples kunai husat i lukautim ol sipsip bilong ol taim ol bin kaikai.

Luk 2:7-8 i tok,

7 Na em i karim namba wan pikinini man bilong em, na raunim Em insait long ol klos bilong raunim bebi, na slipim Em long bokis kaikai bilong ol bulmakau. Bilong wanem, i no gat spes long ol long haus pasindia. 

8 Na i gat i stap long dispela hap graun stret ol wasman bilong sipsip i stap long ples kunai, taim ol i was long ol lain sipsip bilong ol long nait.

Ol sipsip bin kaikai long ples kunai. Em minim olsem i gat ol gras ol ken kaikai. Ol gras, i no ais wara. Olsem na, em bai no Disemba long dispela taim.

Nambawan, nogat wanpela wasman wantaim gutpela tingting bai bringim lain sipsip bilong em i go ausait long wanpela nait i gat ais wara. Sapos nogat, ol bai kamap ais na dai, wasman na lain sipsip bilong em wantaim.

Tru em samting bilong kros olsem planti man bilipim na kisim yet dispela skul tok Katolik Sios bin wokim maski ol bin tokaut olsem tru i no gat man save long bon de tru bilong Kraist. Dispela stap long rait bilong buk bilong ol olsem Katolik Ensaiklopidia, Volum 2, pej 607, husat i tok,

 

Ples klia, de bilong ol bilong wokim amamas bipo em Janueri 6, inap long pop long Rom bin senisim em long 25 Disemba, dispela de stret taim ol haiden Rom bin wokim amamas bilong onarim san god bilong ol, wanpela giaman god.

Ating em wanpela pasin bilong pasin nogut long Kraist, taim yu makim de bilong wokim amamas bilong onarim Em long dispela de bilong wokim amamas bilong tingim wanpela giaman god, a? Wanem samting i nogut moa, em olsem, kain kain lain Protestan tu wantaim ol husat kolim ol yet olsem Evanselikal na Kristen lain, ol tu bin joinim ol Katolik long amamasim Krismas, o bon de bilong Kraist, long 25 Disemba.

Tru, Sios bilong Kraist bilong Manalo tu i bilip long dispela stori Katolik Sios bin wokim long sait bilong Krismas. Ol mekim olsem maski lidaman bilong ol bin tok olsem ol pater Katolik na pasta Protestan, taim em tok olsem ol i no bilong God, tasol bilong Satan o man nogut. Dispela tok strongpela tru ol bin putim pastaim long pepa bilong ol, Pasugo, long Ogas 1961. Long pej 39, em tok,

 

Long pinis, yumi mas givim baksait long ol pater Katolik na ol pasta Protestan bikos ol i ol minista bilong Satan. Yumi mas givim baksait tu long Katolik Sios na kain kain Protestan sios bikos ol i no bilong God, tasol bilong Satan o man nogut. 

Tasol, maski Manalo bin tok nogat long ol Katolik na Protestan sios bikos ol i bilong man nogut, ol i makim na bihainim yet ol pasin na ol bilip bilong ol Katolik na ol Protestan long sait bilong wokim amamas long Krismas.

Piksa daunbilo i soim namba 25 yia bilong marit bilong wanpela bilong ol minista bilong sios bilong ol. Tasol, plis, lukim olsem long baksait bilong ol, i gat ol Krismas bilas na piksa bilong Santa Klos.

 

Long narapela taim ol printim Pasugo long 1969, ol bin putim long pej 16 wanpela toksave bilong ol nupela klos ol susa bilong ol long bilip i bin salim. Dispela toksave bin strongim bel bilong ol bratasusa bilong ol tu long baim ol samting bipotaim bikos Krismas i kam klostu hariap.


 Krismas i stap klostu! Baim ol samting bipotaim nau! Ol Susa Pilar Fernandez, Rosalinda Yadan na Ester Yadan i salim ol nupela klos!

No. D-E-F—Market of Obrero — Blumentritt, Manila 

Home Address: —2722 Ave. Rizal 

Tel. 2-68-33 

I no olsem tasol, ol bilip tu long three kings o tripela king. Daunbilo em piksa bilong tripela brata bilong ol long bilip husat ol bin skelim wantaim tripela king.

Ol i no dispela tripela Saveman husat bin kam long kain kain hap na bihainim lait bilong dispela sta i bin soim dispela taim mama i bin karim Man bilong Kisim Bek long dispela graun, tasol olsem tripela king, dispela tripela man antap tu bin bihainim lait bilong ol skul tok bilong Kraist long wok bilong Sios bilong Em.

Dispela em wanpela longlong. Dispela bilip olsem ol man husat bin bringim ol presen long yangpela Jisas em tripela king, em no tru. Sans olsem ol i ol king em liklik tru bikos ol king i no wokabaut long ol yet tasol, taim ol i no gat wanpela man bilong helpim o wasman.

Bikpela samting moa em olsem. Baibel bin tok olsem ol i ol saveman, tasol em no tok ol i hamas pela. Ol Katolik bin skelim tasol olsem ol i tripela bilong bihainim ol dispela kain presen ol bin givim long yangpela Jisas, olsem insens, gol na mur.

Tasol bilong wanem ol memba bilong Sios bilong God Intenesenel i no save amamasim 25 Disemba o Krismas? Bikos em no tru olsem mama bin karim Kraist long dispela de. Na tu, pop long Rom bin makim tasol dispela de 25 Disemba bilong agensim, o ating resis wantaim, dispela de bilong wokim amamas ol haiden Rom i save tingim bilong onarim san god bilong ol. Olsem ol Kristen, yumi noken gat hap long wanpela samting i doti na i gat sampela samting long sait bilong haiden pasin na pasin bilong lotuim piksa bilong god giaman.

Tasol, noken gat tingting olsem mipela no tingim wanpela de bilong wokim amamas long Kraist. Long hapsait, mipela gat planti taim bilong wokim amamas bilong onarim i no Bikpela Jisas Kraist tasol, tasol Papa tu.

Tok Lukaut: Ol lain bilong tanim tok bilong mipela ol i lukaut na yusim gut tru save bilong ol taim ol i bin tanim dispela blog i go long Tok Pisin. Tasol, ControversyExtraordinary.com i no tok olsem olgeta infomesen ol i bin tanim i no gat asua bikos long sampela ol samting. Taim i gat sampela asua namel long rait i nambawan tru i stap long tok Inglis na rait ol i bin tanim long Tok Pisin, rait i nambawan tru i stap long tok Inglis i winim narapela oltaim.

0 comments:

Olpela Rot Em I Bilong Ol Man Nogut? Lukim Husat I Toktok.

December 19, 2020 0 Ol Toktok long Dispela

Bikos ol manmeri i save gut long redio na tivi program bilong mipela Olpela Rot o The Old Path, dispela brotkas han bilong Ol Memba Sios bilong God Intenesenel (Members Church of God International o MCGI) bilong autim ol skul tok bilong God na Bikpela Jisas Kraist i stap long rait pinis insait long Baibel, sampela lain long Filipins kolim kongrigesen bilong mipela long nem bilong program bilong mipela tu. Long ol, MCGI em Olpela Rot, na wankain sapos yu tanim.

Taim em stap long brotkas 40-pela yia nau, program Olpela Rot bin kisim biknem tru na bikpela luksave olsem planti bilong ol bratasusa bilong mipela bin tanim bel taim ol bihainim dispela program. Ol husat bin was na harim taim mi autim tok, ol i no bin inap abrusim long kamapim gutpela save bilong bihainim Baibel na wanpela laik long kamap ol memba bilong kongrigesen bilong mipela. Olsem na, ol i no tubel long lusim ol lotu bilong ol wan wan na joinim Sios bilong God Intenesenel.

Na bikos oltaim ol narapela lotu lain i lukim ol memba bilong ol i lusim ol bilong joinim grup bilong mipela, ol lidaman na ol paslain memba bilong ol i givim han long bagarapim nem bilong mi na bilong grup bilong mipela, olgeta long laik bilong ol long mekim ol man les long joinim MCGI, o Olpela Rot olsem ol kolim grup bilong mipela.

Wanpela bilong ol dispela samting ol yusim agens long mipela em dispela tok bilong Elipas man Teman, long buk bilong Jop. Yumi mas tingim olsem taim Jop i karim bikpela pen olgeta long planti ol hevi, Elipas bin kam na hatim em, na em i no bin mekim ol toktok bilong givim bel isi na strongim bel.

Long Jop 22:15, Elipas bin askim Jop,

Ating yu bin makim dispela rot bilong bipo ol man nogut i bin wokabaut long en? 

Plis lukim olsem ol dispela em ol tok bilong Elipas na i no bilong God. Elipas bin askim Jop sapos em bai wokabaut yet long rot bilong bipo, (ol bin tanim long Inglis olsem “the old way”) dispela, olsem em tok, ol man nogut i bin wokabaut long en.

Yumi ken skelim long ol tok bilong Elipas olsem Jop bin wokabaut long rot bilong bipo o olpela rot. Sapos nogat, em bai no askim em dispela askim. Tasol tingim olsem Jop i no wanpela man nogut. Tru tru, God Yet bin soim piksa olsem em wanpela man i inap tru, stretpela, i gat pret long God na i no man bilong mekim pasin nogut. (Jop 1:8)

Bihain long longpela toktok na tok pait namel long Jop na Elipas, God bin toktok long belhat bilong Em. 

Jop 42:7 i tok,

Na em i stap olsem, long bihain long BIKPELA i bin tokim ol dispela toktok i go long Jop, BIKPELA i tokim man Timan Elifas, Belhat tru bilong Mi i kirap na birua long yu, na i birua long tupela wantok bilong yu. Long wanem, yupela i no bin toktok long sait bilong Mi long dispela samting i stretpela, olsem wokboi bilong Mi Jop i mekim.

God i no bin amamas, na belhat bilong Em bin kirap long ol dispela samting Elipas na tupela pren bilong Em bin toktok. Olsem na, yumi ken kaunim Elipas olsem wanpela birua bilong God bikos em bin toktok long ol dispela samting agens long laik bilong God.

Tru tru, dispela tok Elipas bin sutim olsem ol man nogut i wokabaut long olpela rot, olsem na em kirapim bel bilong Jop long stop long wokabaut long em, dispela em agens long tok bilong God Yet i stap long rait pinis insait long Buk bilong Jeremaia.

Jeremaia 6:16 i tok,

BIKPELA i tok olsem, Yupela sanap long ol rot, na lukluk, na askim long ol olpela liklik rot, we dispela gutpela rot i stap, na wokabaut insait long en, na yupela bai painim malolo pinis long ol tewel bilong yupela…

Klia tru, long God, pasin bilong wokabaut long olpela rot, em no nogut. Tru tru, Em bin skulim lain manmeri bilong Em long wokabaut long em bikos gutpela rot stap long dispela hap, na ol bai painim malolo bilong ol sol bilong ol long em.

Em minim tu olsem ol husat wokabaut long olpela rot i no nogut bikos ol i ol dispela lain husat i bihainim toksave bilong God. Tasol, ol man bilong toktok agens long mipela, ol husat i no inap klia long ol samting nabaut long Jop 22:15, ol yusim em agens long mipela. Ol yusim ol tok bilong Elipas, wanpela birua bilong God, bilong mekim em kamap olsem ol husat ol memba bilong Olpela Rot (ol minim grup bilong mipela), ol i nogut. Em giaman tru!

Ol memba bilong Sios bilong God Intenesenel, o Olpela Rot olsem planti i kolim, ol i no nogut. Tru tru, ol manmeri i save long ol bratasusa bilong mipela long daun pasin, pasin bilong soim sori, gutpela bel na pret long God, na ol man husat mekim ol samting wantaim ol, ol i inap long givim witnes long dispela.

Ol rekod bilong kot tu inap givim witnes olsem mipela i no gat wanpela memba husat i man bilong kilim man, i no olsem long ol narapela lotu i gat ol memba husat i strong tru long kilim man long ol samting nating, olsem wanpela pait long taim bilong pilai basketbol.

Dispela em wanem samting sampela memba bilong wanpela sios i bin kamap long Filipins, ol bin mekim long ol birua bilong ol taim ol pilai basketbol. Ol bin bagarapim ol long ol pasin bilong givim pen i nogut tumas inap long ol bin lusim laip, na bihain ol bin tromoi ol daibodi bilong ol long Riva Pasig. Tru, ol lidaman bilong sios bilong ol bin yusim ol mani samting na ol man bilong helpim ol long sambai long ol. Tasol, Suprim Kot bin lukim olsem i no gat tupela tingting olsem ol bin mekim rong.

Mipela no save mekim kain ol samting insait long Sios bilong God. Ol bratasusa bilong mipela i lainim gut ol pasin Kristen na ol i wanbel wantaim administresen bilong Sios long strongim bilip, hop na laikim tru long olgeta man long wok bilong autim Gutnius na long wok bilong ol pablik sevis na ol wok bilong soim sori mipela save mekim.

Mipela tokaut olsem mipela gat planti birua husat i toktok agens long mipela, mi yet, moa yet. Ol olgeta laik daunim mi. Ol olgeta laik pasim maus bilong mi bikos taim mi autim Gutnius i no gat doti, dispela i kamapim trabel long ol grup bilong ol. Taim ol memba bilong ol i stat long harim ol brotkas bilong mi, ol i no inap pasim ol long painim rot bilong ol long lusim lotu bilong ol.

Long dispela taim, kampen bilong ol em long bagarapim nem bilong mi na bilong grup bilong mipela, taim ol yusim ol social media platform. Wanpela bilong ol bin sutim tok tu olsem mi kamapim ol stori tasol taim mi autim tok. Dispela em giaman ples klia!

Wanpela samting mi no bin mekim na mi bai no mekim liklik, em long autim giaman. Mi no sambai long mi yet, tasol mi larim ol narapela man (husat mi yet mi no save long ol) na ol narapela grup i gat biknem i toktok bilong kisim maus bilong mi sapos tru yu no inap bilipim autim tok bilong mi o nogat.

 Wanem taim mi autim tok, maskim em long redio, tivi o sosel midia, mi lukluk long em olsem oltaim olgeta toktok bilong mi i tru, ol pruf i sapotim ol dispela, na ol i bihainim Baibel. Mi no save wokim ol stori. Mi save lukluk olsem ol toktok bilong mi i bihainim gutpela tingting, i gat nid long ol, na ol i givim save. Sapos nogat, ol grup i gat biknem husat i save givim ol prais, ol no bin luksave long ol wok bilong mi.

Larim mi kolim wan wan bilong ol dispela luksave. Long 3rd Annual Open Mashable Awards long 2009, blogsait bilong mi esoriano.wordpress.com bin kisim prais olsem Most Educational to Follow. Long 4th Annual Gawad Amerika long 2006, program bilong mipela Olpela Rot bin kisim prais olsem Most Informative Religious Program. Na long 10th Annual Gawad Amerika long 2011, Ang Dating Daan bin kisim prais olsem Best Religious Program.

Tru, ol dispela luksave i givim mipela bikpela hambak na ona, tasol, mipela save olsem mipela no bin inap kisim wanpela bilong ol sapos God i no bin helpim na stiaim mipela. Olsem na, long Em mipela ofaim olgeta ona na glori. 

Taim ol tok tru bilong Baibel i stiaim mipela long Sios bilong God Intenesenel, mipela save olsem inap long pinis, bai i gat yet ol man husat bikpela tingting bilong ol em long salim go nabaut ol tok giaman, giamanim na paulim ol man, na bringim ol long bagarap olgeta.

Tasol wantaim helpim bilong God, mipela bai no larim kain ol man olsem long pasim mipela long mekim planti man i save long Gutnius na long strongim bel bilong ol narapela man olsem mipela long wokabaut long olpela rot, o dispela gutpela rot, olsem God bin tok strong, bikos dispela em dispela rot bilong bringim ol long kisim bek.

Glori i go long God. 

Tok Lukaut: Ol lain bilong tanim tok bilong mipela ol i lukaut na yusim gut tru save bilong ol taim ol i bin tanim dispela blog i go long Tok Pisin. Tasol, ControversyExtraordinary.com i no tok olsem olgeta infomesen ol i bin tanim i no gat asua bikos long sampela ol samting. Taim i gat sampela asua namel long rait i nambawan tru i stap long tok Inglis na rait ol i bin tanim long Tok Pisin, rait i nambawan tru i stap long tok Inglis i winim narapela oltaim.

0 comments:

Dispela Wanpela Rot Klia Tru Inap long God Bai Putim Yau Taim Yumi Singaut

December 12, 2020 0 Ol Toktok long Dispela

I gat ol man husat bin kamapim dispela tingting olsem sapos ol beten na singautim nem bilong Bikpela, God bai kisim bek ol. Dispela i no tru. Ol i givim ol yet giaman hop tasol.

Tok tru em olsem, maski sapos yu wok long beten, maski sapos yu wok long singaut long nem bilong Bikpela, God bai no kisim bek yu sapos yu no bihainim laik bilong Em.

Olsem rait i stap pinis long Matyu 7:21,

I no olgeta wan wan husat i tokim Mi, Bikpela, Bikpela, bai go insait long kingdom bilong heven. Tasol em husat i mekim laik bilong Papa bilong Mi husat i stap long heven.

Long go insait long kingdom bilong heven, yu mas mekim laik bilong Papa, olsem, yu mas bihainim ol tok strong bilong Em nay u mas mekim wanem samting Papa laikim yu long mekim.

Eklesiastes 12:13 i tok, 

Larim yumi harim pinis bilong ol dispela samting olgeta. Pret long God, na holimpas ol tok strong bilong Em. Long wanem, dispela em i wok stret olgeta bilong man.

Nambawan wok tru bilong man em long bihainim ol tok strong bilong God na i no ol tok strong na ol skul tok bilong kain kain lotu lain olsem Katolik Sios. Sapos wanem samting yu bai bihainim em ol skul tok ol i wokim, olsem yusim rosari long beten nainpela de wanpela bihain long narapela o novena, wokabaut long ol skru bilong lek bilong yu long ol namel bilong ol haus lotu stat long dua i go long alta, na lindaun long ai bilong ol piksa ol bin sapim na ol piksa na lotuim ol, God bai no kisim bek yu. Olgeta dispela pasin, ol Katolik i save bihainim, ol stap aninit long pasin bilong lotuim piksa bilong god giaman na ol agensim stret ol skul tok bilong God insait long Baibel. Na tru tru, kain ol pasin bai no bringim yu go long heven.

Tingim, inap long God kisim bek yu na yu kisim heven long taim bihain, yu mas bihainim ol tok strong bilong God, i no long agensim ol. Pasin bilong lotuim piksa bilong god giaman, em wanpela pasin bilong birua stret long tok strong bilong God. Ol piksa na ol piksa ol bin sapim i noken kamap ol samting bilong lotuim, maski sapos ol bin wokim ol long gol na silva.

Aposel 17:29 i tok,

Bikos nau yumi kamaut long God, yumi no ken ting olsem dispela Godhet em i wankain olsem gol, o silva, o ston, dispela man i sapim long save samting na plen bilong man.

Long ting tasol olsem pasin bilong stap God, yu ken soim long ol piksa ol bin sapim na ol piksa ol bin wokim long gol, silva na ston, em rong tru. Em kamap nogut moa sapos yu bai lindaun long ai bilong ol, ofaim ol plaua na laitim ol kandel long ol, na beten long ol. Tasol, ol dispela stret em wanem samting ol Katolik pater i skulim long ol man bilong bihainim ol long mekim, ol strongim bel bilong ol man long mekim pasin bilong lotuim piksa bilong god giaman.

God i tambuim pasin bilong lotuim piksa bilong god giaman. Tasol, dispela samting Em tambuim em no stap tasol long pasin bilong lotuim ol piksa ol bin sapim. Em go inap long pasin bilong sapim ol piksa na ol piksa ol bin sapim. Kain samting tu em pasin bilong birua long ol tok strong bilong God.

Olsem rait i stap pinis long Lo 5:8-9,

8 Yu no ken wokim bilong yupela wanpela piksa o wanpela piksa ol i sapim long wanpela samting i stap long heven antap o i stap long dispela graun daunbilo, o i stap long ol wara aninit long dispela graun. 

9 Yu no ken mekim yu yet i lindaun long ol o mekim wok long ol. Long wanem Mi God BIKPELA bilong yu em i jeles God, na Mi makim sin bilong ol papa i go long ol pikinini inap long tripela o fopela lain tumbuna pikinini bilong ol lain i no laikim tru Mi.

Em God husat yu mas lotuim na i no ol god giaman. Klia tru, pasin bilong lotuim na givim biknem long ol god giaman, em soim ples klia pasin bilong hetim God. Olsem na sapos yu tok olsem yu laikim tru God, em Em Yet husat yu mas lotuim, givim biknem long en na makim ol samting, i no long ol piksa ol bin sapim.

Tasol, wanem samting God tambuim ol man long mekim, em wanem samting ol Katolik pater i strongim bel bilong ol man long en. Long dispela, ol mekim Satan yusim ol long senisim tok tru bilong God long wanpela giaman taim ol skulim ol manmeri long lotuim dispela samting God i kamapim long nating na i no Em husat bin kamapim long nating olgeta samting.

Rom 1:25 i tok, 

Husat i bin senisim tok tru bilong God i kamap wanpela giaman, na lotuim na bihainim samting God i wokim moa long Man i kamapim olgeta samting long nating, husat i gat blesing oltaim oltaim. Amen. 

Olsem na, noken tanim bilip na strong bilong yu long ol narapela samting God bin kamapim long nating olsem yu, olsem Maria, ol aposel na ol ensel, tasol yu mas putim ol long Em husat bin kamapim long nating olgeta samting. Na noken autim ol beten bilong yu long ol dispela lain, tasol yu mas autim ol long Em husat bin kamapim long nating olgeta samting.

Tasol, tingim olsem i no olgeta husat i singaut long nem bilong Bikpela bai go insait long kingdom bilong heven, tasol ol tasol husat i bihainim ol tok strong bilong God. Em minim olsem, pasin bilong yu bilong bihainim ol skul tok na ol tok strong bilong God, dispela bai mekim yu inap tru long go insait long kingdom bilong heven. 

Tok Lukaut: Ol lain bilong tanim tok bilong mipela ol i lukaut na yusim gut tru save bilong ol taim ol i bin tanim dispela blog i go long Tok Pisin. Tasol, ControversyExtraordinary.com i no tok olsem olgeta infomesen ol i bin tanim i no gat asua bikos long sampela ol samting. Taim i gat sampela asua namel long rait i nambawan tru i stap long tok Inglis na rait ol i bin tanim long Tok Pisin, rait i nambawan tru i stap long tok Inglis i winim narapela oltaim.

0 comments:

I Gat Nid long Lotu I Go long Kisim bek, o Nogat?

December 06, 2020 0 Ol Toktok long Dispela


Planti pritsa nau bin kamap ol man i no save lukaut na i no gat wari long ol samting bilong kamap bihain, olsem na klostu ol i no wari liklik sapos ol dispela skul tok ol i mekim ol man long bilipim na kisim, ol i no bihainim moa ol skul tok bilong Bikpela Jisas Kraist i stap long rait bilong Baibel. 

Wanpela piksa bilong dispela em skul tok bilong ol olsem man i no nidim lotu moa bilong kisim bek. Wanem samting man i nidim, ol i tok, em long gat bilip long Kraist, kisim Em, na wantu, God bai kisim bek em. 

Dispela em bikpela tok giaman! Em no tru olsem man i no nidim lotu moa. Tru, Baibel i toktok long wanpela pasin lotu klin tru na i no gat doti, Bikpela Jisas Kraist bin skulim long ol aposel. Dispela i minim tasol olsem i gat nid long lotu na em bikpela samting. Sapos nogat, Bikpela Jisas Kraist i no bin skulim em.

Tasol, i no olgeta lotu i klin tru na i no gat doti. Planti bilong ol i pulap long ol doti na ol giaman pasin. Olsem na, ol man bilong bihainim ol i no kamap holi tasol ol i kamap wanpela bung bilong ol man bilong tupela maus. Kain ol lotu olsem yu ken kaunim samting nating o i no gutpela bilong helpim, bikos ol fel long mekim ol memba bilong ol long kamap inap tru long kisim bek. Baibel i toktok long ol dispela lotu olsem samting nating. 

Jems 1:26 i tok,

Sapos wanpela man namel long yupela i luk olsem em i gat lotu pasin, na em i no stiaim gut tang bilong em, tasol em i giamanim bel bilong em yet, lotu bilong dispela man em i samting nating.

Sapos wanpela luk olsem man bilong bihainim lotu tasol em no save pasim tang bilong em na tu em giamanim bel bilong em yet, lotu bilong dispela man em samting nating o i no gutpela bilong helpim. 

Tasol dispela pasin lotu klin tru na i no gat doti, Bikpela Jisas Kraist bin skulim long ol aposel, klia tru em no samting nating na giaman nating. Olsem na, yu noken tok nogat long em o tingim em olsem i no bikpela samting o i no gat nid long en.

Jems 1:27 i tok,

Lotu pasin i klin na i no doti long ai bilong God na Papa em dispela, Long em i go lukim ol lain i no gat papa na ol meri man bilong ol i dai pinis long taim hevi bilong ol, na bilong pasim em yet long gat ol mak nogut i kam long dispela graun.

Wanpela bilong ol mak klia tru bilong wanpela pasin lotu klin tru, em olsem. Em save wari long ol meri, man bilong ol i dai pinis, na ol pikinini, papa bilong ol i dai pinis, na ol husat bihainim dispela lotu i pasim ol yet long gat ol mak nogut i kam long dispela graun. Kain olsem, ol i no yusim ol yet long ol amamas nogut olsem pilai laki, pasin bilong dring, ol drag, na ol narapela samting bilong dispela graun. Ol i kisim Bikpela Jisas Kraist na ol i bihainim ol skul tok bilong Em.

Pasin bilong kisim Bikpela Jisas Kraist, em noken stap long maus tasol. Taim yu kisim Kraist, yu mas kisim ol tok na ol skul tok bilong Em tu, bikos taim yu tok nogat long ol skul tok bilong Em, em olsem yu tok nogat long Em tu.

Olsem rait stap pinis long Jon 12:48,

Em husat i tok nogat olgeta long Mi, na i no kisim ol toktok bilong Mi, i gat wanpela husat i jasim em. Dispela tok Mi bin toktok, dispela stret bai jasim em long las de.

Em bai kamap olsem, sapos yu tok nogat long ol skul tok bilong Bikpela Jisas Kraist long sait bilong lotu, long sait bilong Sios, na long sait bilong pasin lotu, olsem yu tok nogat long Kraist. Na sapos yu tok nogat long Kraist, God bai no kisim bek yu bikos Em i Man bilong Kisim Bek. 

Dispela pasin lotu klin tru na i no gat doti, Kraist bin skulim long ol aposel, ol i save bihainim insait long dispela Sios Bikpela Jisas Kraist Yet bin wokim. Olsem na, sapos yu harim ol pasta na ol pritsa i tok olsem i no gat nid moa long Sios, yu inap klia tru olsem kain ol pritsa i toktok taim ol no save bikos Baibel i tokim yumi olsem Bikpela Jisas Kraist bin wokim wanpela Sios (Matyu 16:18).

Ating ol minim olsem Bikpela Jisas Kraist bin wokim sampela samting i no gutpela bilong helpim o i no bikpela samting long kisim bek? Na wanem samting bin givim rait long ol long mekim long kamap samting nating, wanem samting Bikpela Jisas Kraist bin wokim? Dispela tok tru olsem Kraist bin wokim wanpela Sios, em minim tasol olsem em gat bikpela wok long kisim bek bilong man. 

Nau, long mekim stretpela dispela kranki tok bilong ol olsem i no gat nid moa long lotu na Sios bilong kisim bek, bikos ol i tok olsem bilip long Kraist i inap, ol dispela pritsa i yusim stori bilong dispela stilman husat ol bin nilim long diwai kros wantaim Kraist. Ol bai tok olsem stilman bin bilip tasol long Kraist, em no bin bihainim wanpela lotu, na em no bin joinim Sios, tasol Kraist bin promisim paradais long em. 

Tasol, ol dispela pasta i no bin klia olsem bilip long Kraist, moa yet long ol toktok bilong Em, em tasol dispela samting stilman inap mekim bikos em hangamap pinis long diwai kros na em laik dai. 

Ples klia, bipo las aua bilong em i kam, stilman bin gat sans long harim ol dispela toktok Bikpela Jisas Kraist bin autim taim ol bin stap long diwai kros. Na bikos long wanem samting em bin harim, em bin bilip.

Em minim, bilip bilong stilman long Kraist bin kamap long ol dispela tok em bin harim long Em na i no long ausait luks bilong Em. Bikos long dispela taim, i no gat wanpela samting naispela tru long ausait luks bilong Kraist bikos skin bilong Em bruk, blut kam ausait long Em na Em bin stap skin nating. 

Tingim, ol Ju bin pilai satu long klos bilong Em, na olsem Hibru 6:6 i tok, ol “mekim Em kisim sem ples klia,” em minim olsem ol bin putim Em long bikpela sem tru. Na wanem samting ken sem tru moa long bodi bilong yu stap skin nating bai stap ples klia long olgeta man? Tasol bikos long ol dispela tok em bin harim long Kraist taim ol bin stap long diwai kros, stilman bin bilip long Em, na em bin tok, “Bikpela, holim tingting long mi taim Yu kam long kingdom bilong Yu.” (Luk 34:42). Na long em, Bikpela Jisas Kraist bin bekim, “Tru tumas, Mi tokim yu tude, Bai yu stap wantaim Mi long paradais.” (Luk 23:43) 

Taim yu tingim stap bilong stilman, em bin hangamap long diwai kros na i laik dai, na sotpela taim tru bilong em long stap laip, stilman ken joinim Sios na long bihainim lotu. Tasol sapos ol bin mekim em go fri na givim sans long stap laip longtaim moa, taim ol no gat tupela tingting, klia tru stilman bai joinim dispela Sios Bikpela Jisas Kraist bin wokim na go pas long en na kamap wokboi bilong Em. 

Tasol yu mas klia olsem dispela blesing yu no inap abrusim, dispela bin kam long rot bilong stilman, ol husat tok nogat na givim baksait long laik long ol skul tok bilong Bikpela Jisas Kraist, ol no inap gat amamas o yusim, maski ol tok olsem ol bin kisim long Em. 

God ken blesim yumi olgeta!

Tok Lukaut: Ol lain bilong tanim tok bilong mipela ol i lukaut na yusim gut tru save bilong ol taim ol i bin tanim dispela blog i go long Tok Pisin. Tasol, ControversyExtraordinary.com i no tok olsem olgeta infomesen ol i bin tanim i no gat asua bikos long sampela ol samting. Taim i gat sampela asua namel long rait i nambawan tru i stap long tok Inglis na rait ol i bin tanim long Tok Pisin, rait i nambawan tru i stap long tok Inglis i winim narapela oltaim.

0 comments: