Skelim Gut long Stap bilong Bikpela Jisas Kraist

October 07, 2019 0 Comentarios


Tru mi painim em narakain tru olsem i gat ol man husat i tokaut long stap memba bilong ol lotu lain husat i tok olsem ol yet i ol Kristen tasol ol i stap yet wantaim tupela tingting long sapos tru Bikpela Jisas Kraist bin stap o nogat. Tru mi tingting planti bilong wanem maski ol i stap ol memba bilong ol dispela sios husat i yusim tu Baibel, dispela tingting bilong ol i no klia long sait bilong stap bilong Kraist, em i no pinis olgeta yet.

Long sait bilong mi yet, mi gat ol as i moa long inap bilong bilipim stap bilong Bikpela Jisas Kraist. Ol atheist (man husat i no bilip long i gat God i stap) na ol agnostic (man husat i bilip olsem i no gat wanpela samting yu inap save long stap o pasin bilong stap God), ol dispela krankiman tasol i tokaut klia long tupela tingting long stap bilong Bikpela Jisas Kraist.

Bikpela Jisas Kraist bin stap pinis bipo long taim God bin kamapim long nating dispela graun, na Em i stap inap long nau. Bipo long olgeta narapela samting bin stat long stap, Kraist i stap pinis wantaim Papa. Em i bin lainim em, na ol tok bilong God i pruvim em insait long Baibel.

JON 8:56-58 i tok,

56 Papa bilong yupela Ebraham i wokim amamas tru bilong lukim de bilong Mi. Na em i lukim pinis, na em i amamas.
57 Nau ol Ju i tokim Em, Yu no gat 50 krismas yet, na Yu bin lukim Ebraham?
58 Jisas i tokim ol, Tru tumas, tru tumas, Mi tokim yupela, Bipo Ebraham i stap, Mi stap.

Insait long “An American Translation”, ol i bin tanim ves 58 olsem: “Jesus said to them, ‘I tell you, I existed before Abraham was born!’”

Long dispela as yumi inap tok olsem, ol man bilong autim tok nau husat i skulim ol memba bilong ol olsem stap bilong Kraist bin stat tasol taim Maria bin karim Em, ol i paul olgeta. Dispela em i wanpela pruf olsem ol i sot long gutpela save long tok bilong God insait long Baibel.

Tingim, i no gat narapela husat bin stap wantaim Papa long oltaim oltaim tasol Kraist.

MAIKA 5:2 i tok,

Tasol yu, Betlehem Efrata, maski yu stap liklik namel long ol tausen bilong Juda, yet ausait long yu bai em i kam ausait i kam long Mi husat i mas stap hetman bilong Isrel, husat ol wokabaut i go ausait bilong em em i bin bilong bipo, bilong oltaim oltaim bipo.

Olsem profet Maika i tok, Em i bin kam long oltaim oltaim bipo. Na narapela ves i sapotim dispela.

Insait long Provep 8:22, save tru bilong God i tok, “BIKPELA i bin holimpas mi long stat bilong rot bilong Em bipo long ol wok bilong En bilong bipo.”

Stat bilong rot bilong Bikpela em i stap insait long oltaim oltaim. Dispela “save tru” i bin stap wantaim Bikpela long oltaim oltaim. Husat em i dispela “save tru” husat bin stap wantaim God long stat bilong rot bilong Em, bipo long ol wok bilong Em bilong bipo?

1 KORIN 2:-8 i tok,

6 Tasol mipela i toktok wantaim save tru namel long ol husat i inap tru. Tasol i no save tru bilong dispela graun, o bilong ol hetman bilong dispela graun, dispela i kamap samting nating.
7 Tasol mipela i toktok long save tru bilong God insait long wanpela tok hait, yes, save tru i hait, dispela God i makim bipo dispela graun i kamap i go long glori bilong yumi.
8 Dispela i no gat wanpela bilong ol hetman bilong dispela graun i save. Long wanem, sapos ol i bin save long en, ol i no bin gat laik long nilim Bikpela bilong glori long diwai kros.

Dispela “save tru” olsem Aposel Pol bin toktok long en, em i Bikpela bilong glori na dispela Bikpela husat ol bin nilim long diwai kros, husat i no narapela, em i Bikpela Jisas Kraist.

1 KORIN 1:24 i tok,  

Tasol long ol husat God i singautim, ol Ju na ol Grik wantaim, Kraist em i pawa bilong God, na save tru bilong God.

Insait long Olpela Testamen, ol i bin kolim Kraist olsem “save tru bilong God.” Em i pawa bilong God na save tru bilong God. Plis lukim dispela hap tok “the” (long tok Inglis) Pol bin yusim, dispela i minim olsem i no gat “save tru” insait long Baibel, husat bin stap wantaim God long oltaim oltaim, narapela long Bikpela Jisas Kraist. Ol i bin kolim Em “save tru bilong God.”

Luk 11:49 i pruvim moa olsem dispela save tru bilong God em i Bikpela Jisas Kraist.  

Olsem na tu save tru bilong God i tok, Mi bai salim ol ol profet na ol aposel, na sampela bilong ol bai ol i kilim i dai na givim hevi.

Bikpela Jisas Kraist i bin stap long oltaim oltaim. Tru Em i stap inap long nau. Na stap bilong Em bai i go inap long oltaim oltaim. Olsem rait i stap pinis insait long Revelesen 1:17-18,

17 Na taim mi lukim Em, mi pundaun long tupela lek bilong Em olsem mi dai pinis. Na Em i slipim han sut bilong Em antap long mi, taim Em i spik long mi, No ken pret. Mi stap namba wan na las.
18 Mi stap Em husat i stap laip, na i bin dai pinis, na, lukim, Mi stap laip oltaim oltaim, Amen. Na Mi gat ol ki bilong hel na bilong dai.

Taim Jon bin lukim God, Em i bin tokim em, “…Mi stap namba wan na las. Mi stap Em husat i stap laip, na i bin dai pinis, na, lukim, Mi stap laip oltaim oltaim,”

Wanem ol ves mi bin kolim em i sampela bilong ol ves i kam long Rait Holi bilong pruvim stap oltaim oltaim bilong Bikpela Jisas Kraist. Tasol, narapela long ol as bilong bilip insait long Baibel, yumi gat ol narapela pruf tu, dispela bai pruvim stap bilong Bikpela Jisas Kraist. Wanpela bilong dispela em i wanpela stori stret i stap insait long ol rait bilong histori bilong Rom.

Man bilong raitim histori bilong Rom, Tasitas, i bin tingim sampela samting insait long dispela we em i bin toktok long sait bilong Kraist, Taibirias Sisa, na Ponsias Pailat.


Olsem dispela infomesen i tok, i gat wanpela lain bilong ol man, ol i kolim ol olsem ol Kristen, em i ol man bilong bihainim Kraist, long husat Nambawan King (Emperor) Niro i bin givim ol mekim save bilong givim bikpela pen tru. Tasol Kraist i bin karim pen long mekim save i nogut olgeta long taim bilong bosim kingdom bilong Taibirias long han bilong Ponsias Pailat. Dispela i minim olsem sosaiti bilong Rom i bin luksave long stap bilong wanpela komuniti bilong ol Kristen long dispela taim, taim Rom i pulap tru long pawa yet.

Narapela long dispela rait bilong histori, yumi gat ol pruf bilong bodi sait tu bilong pruvim stap bilong ol narapela lain husat ol nem bilong ol i bin stap insait long ol dispela rait bilong histori – Taibirias Sisa na Ponsias Pailat.

Taim Bikpela Jisas Kraist i bin bon, nambawan king bilong Rom long dispela taim, em i Ogastas Sisa husat bin bosim kingdom stat long yia 31 bipo long Kraist i bon i go long yia 14 bihain long Kraist i bon. Bihain, Taibirias Sisa i bin kisim ples bilong em, husat i bin bosim kingdom stat long yia 14 i go long yia 37 bihain long Kraist i bon. Dispela tupela Sisa – Ogastas na Taibirias – ol i bin gat namba long taim bilong laip bilong Bikpela Jisas Kraist long dispela graun.

Na ol painimaut bilong archaeology (stadi bilong histori long wok bilong digim ol hap bilong dispela graun na skelim ol samting ol i painim long ol) i bin tok yes long stap bilong dispela ol nambawan king bilong Rom.

Ol koin i gat ol piksa bilong ol, ol i bin kisim i kam ausait long graun na ol i lukautim nau long ol musiam. Ol i dispela koin stret i stap long rait bilong Baibel taim ol Farisi i bin traim long trepim Bikpela Jisas Kraist bilong painim wanpela as bilong kilim Em i dai aninit long gavman bilong Rom. 


Dispela i stap pinis long rait insait long Matyu 22:17-21, we dispela i tok,  

17 Olsem na tokim mipela, Yu ting wanem? Em i orait aninit long lo long givim takis mani long Sisa, o nogat?
18 Tasol Jisas i kisim save long ol pasin nogut bilong ol, na tok, Bilong wanem yupela i traim Mi, yupela ol man bilong tupela maus?
19 Soim takis mani long Mi. Na ol i bringim wanpela peni long Em.
20 Na Em i tokim ol, Dispela piksa na rait ol i sapim long en em i bilong husat?
21 Ol i tokim Em, Bilong Sisa. Nau Em i tokim ol, Olsem na bekim long Sisa ol dispela samting i bilong Sisa, na long God ol dispela samting i bilong God.

Dispela stori i toktok long wanpela kain koin, insait long dispela piksa bilong Sisa, em i bilong Ogastas o bilong Taibirias, em i stap insait long rait bilong koin. Olsem mi tok bipo, ol i bin painim sampela bilong ol dispela koin. Mi, mi yet tu i gat wanpela koin insait long laibreri bilong mi, dispela i gat piksa bilong Taibirias Sisa na narapela koin i gat piksa bilong Ogastas Sisa.

Long sait bilong ofisa bilong bikpela kingdom bilong Rom, Ponsias Pailat, yumi gat pruf bilong bodi sait tu bilong pruvim stap bilong em.

Long 1961, ol i bin painimaut wanpela ston (limestone), na rait ol i bin katim long em i gat ol nem bilong Taibirias Sisa na Ponsias Pailat.


Ples klia, dispela ston dispela archeologist (man husat i stadim archeology), wanpela man Itali, i bin painim, ol i bin mekim em aninit long strongpela tok bilong Ponsias Pailat. Nogut ol i bin mekim em bilong bihainim laik bilong Pailat long amamasim bel bilong king bilong em, bikos ol i bin katim long em ol toktok i go long Taibirias Sisa.

Olgeta dispela i pruvim stap tru bilong ol stori insait long Baibel, moa yet ol dispela stret long sait bilong stap bilong Bikpela Jisas Kraist, na tu ol toktok long sait bilong sampela ol lain olsem ol nambawan king bilong Rom – Ogastas na Taibirias, na ofisa Ponsias Pailat, bikos ol pruf bilong bodi sait na ol rait bilong histori i witnes tu long ol.

Na mi no bilip olsem ol man bilong raitim histori bilong Rom bai wok wantaim na kamapim wanpela giaman stori long sait bilong Kraist husat bikpela kingdom   bilong Rom i bin kilim i dai. Stap bilong Kraist na dispela lain husat Em i bin go pas long en 2,000 yia bipo, ol i bin kolim ol olsem ol Kristen, em i sampela ol samting tru histori bilong Rom i no inap haitim bikos ol i stap pinis long rait na i kamap hap bilong ol rait bilong histori bilong ol.

Tru tumas, ol stori insait long Baibel, ol rait bilong histori na ol painimaut bilong archeology i moa long inap long tekewe olgeta tupela tingting long sait bilong stap bilong Kraist. Kraist i bin stap long oltaim oltaim bipo wantaim Papa, Em i stap nau, na Em bai stap inap long oltaim oltaim. I TRU.

Tok Lukaut: Ol lain bilong tanim tok bilong mipela ol i lukaut na yusim gut tru save bilong ol taim ol i bin tanim dispela blog i go long Tok Pisin. Tasol, ControversyExtraordinary.com i no tok olsem olgeta infomesen ol i bin tanim i no gat asua bikos long sampela ol samting. Taim i gat sampela asua namel long rait i nambawan tru i stap long tok Inglis na rait ol i bin tanim long Tok Pisin, rait i nambawan tru i stap long tok Inglis i winim narapela oltaim.

0 comments: