Bilong Wanem Sampela Man i Bin Gat Longpela Laip Wantaim Bel Isi?

November 24, 2019 , 0 Comentarios


Tete, yumi stap laip long wanpela taim we yumi inap tok olsem pasin nogut bilong man i kamap long wanpela kain mak i no gat man bin tingting long en bipo. Taim dispela i stap olsem, sampela taim wanpela man nating i askim bilong wanem God i larim yet ol man bilong mekim pasin nogut long stap longpela taim moa yet. Bilong wanem Em i no kilim ol olgeta tasol, o pinisim ol olgeta antap long dispela graun? Na bilong kisim ples bilong ol, bilong wanem Em i no larim ol stretpela wan stap na amamas wantaim ol longpela laip i pulap long bel isi?

Sapos yumi bai lukluk long Baibel, Sam 90:10 i toktok long hamas yia bilong laip wanpela man i ken gat. Em i tok,

Ol de bilong ol krismas bilong mipela i 60-pela krismas na tenpela. Na sapos mipela i gat strong na mipela i stap 80 krismas, orait strong bilong ol em hatwok na bel sori tasol. Long wanem kwiktaim em i pinis na mipela flai i go.

Wanpela man ken stap laip inap long em i gat 70 o 80 krismas, bilong bihainim strong bilong bodi bilong em.

Tasol narapela long strong bilong bodi, narapela samting bilong helpim wanpela man long gat longpela laip em i pret bilong em long God.

Olsem rait i stap pinis insait long Provep 10:27,  

Pret long BIKPELA i mekim ol de i kamap moa. Tasol ol yia bilong man nogut bai go sot.

Olsem na, God ken mekim i kamap longpela laip bilong wanpela man sapos em i save pret long God.

Tasol, dispela i no olsem olgeta taim. I no olgeta husat i gat longpela laip em i ol man husat i gat pret long God. I gat sampela taim we God i larim ol man nogut i stap laip longpela taim moa bikos Em i givim ol sans long ol long tanim bel na long senis olsem na ol bai gat wanpela sans tu long kisim bek. God i no tekewe yet ol laip bilong ol maski ol i mekim pasin nogut bikos Em i laikim ol long kam long pasin bilong tanim bel.

Nau, sapos i gat ol man nogut husat i stap laip longpela taim, i gat ol stretpela man husat i dai taim ol i yangpela. Insait long Baibel, i gat ol stretpela man husat bin dai bipotaim olsem Jon dispela Baptist na Bikpela Jisas Kraist, tupela wantaim bin dai bipo ol i gat 34 krismas. Wankain samting i kamap long Aposel Jems, husat tu bin dai taim em i yangpela.

Tasol narapela long ol dispela lain insait long Baibel, yumi i save tu long ol stori bilong ol bebi husat i no mekim rong insait long ol bel bilong ol mama bilong ol. Ol narapela i dai taim ol i stap bebi yet bikos long ol sik i kamap taim ol i stap insait long bel, o sampela taim bikos long pasin bilong givim baksait na pasin i no soim sori bilong ol narapela man.

Dispela askim planti i askim em i olsem. Bilong wanem God i larim ol stretpela man na ol man husat i no mekim rong long dai bipotaim?

Aisea 57:1 i tok,

Stretpela man i bagarap, na i no gat wanpela man i pilim dispela long bel bilong em. Na Em i tekewe ol man i pulap long sori, na i no gat wanpela i tingim na skelim long Em i bin tekewe stretpela man long taim nogut i laik kamap.

I gat ol taim God i tekewe laip bilong wanpela gutpela o stretpela man bipotaim tru bilong kisim bek em long dispela nogut i laik kamap bihain. Ples klia dispela em i wanpela pasin bilong God bilong soim sori long em bikos Em i no gat laik olsem dispela nogut i laik kamap bai bagarapim em.

Tasol, God i mekim i kamap longpela ol laip bilong ol husat i save sakim tok bilong Em bikos Em i givim ol sans bilong tanim bel na senis long ol, dispela tu em i wanpela pasin bilong laikim tru na sori bilong Em i go long ol.

2 Pita 3:9 i tok,

Bikpela i no slek long sait bilong promis bilong Em, olsem sampela man i kaunim pasin slek. Tasol Em i karim pen longpela taim i kam long yumi, taim Em i no gat laik long wanpela i ken dai olgeta, tasol long olgeta i ken kam long tanim bel.

God i no gat laik long wanpela man long dai olgeta, long dispela as Em i givim ol sans long ol man nogut long kam long pasin bilong tanim bel inap long God i kisim bek ol.

Oltaim yumi mas tingim olsem God Em i pasin bilong laikim tru. Em i stretpela na pulap long sori. Sapos Em bai tekewe laip bilong wanpela stretpela man bipotaim, o sapos Em bai mekim i kamap longpela laip bilong wanpela man nogut, yumi ken klia tru long i gat wanpela gutpela as tingting long dispela. Na em i no samting bilong yumi long tok birua long laik bilong Em. Tasol yumi ken klia tru olsem wanem tingting Em i wokim, oltaim em i kam long jastis, pasin bilong laikim tru na sori.

Tok Lukaut: Ol lain bilong tanim tok bilong mipela ol i lukaut na yusim gut tru save bilong ol taim ol i bin tanim dispela blog i go long Tok Pisin. Tasol, ControversyExtraordinary.com i no tok olsem olgeta infomesen ol i bin tanim i no gat asua bikos long sampela ol samting. Taim i gat sampela asua namel long rait i nambawan tru i stap long tok Inglis na rait ol i bin tanim long Tok Pisin, rait i nambawan tru i stap long tok Inglis i winim narapela oltaim.

0 comments: