Stap bilong Kraist I Bin Stat long Oltaim Oltaim, I No long Bel bilong Maria. Ful Stop.
Stap bilong Bikpela Jisas Kraist i bin stat long wanem taim na long wanem hap? Stap bilong Em i bin stat tasol taim Maria i bin kisim bel long Em, wankain olsem wanem samting Iglesia ni Cristo (Sios bilong Kraist) bilong Manalo i bilipim?
Dispela bilip stret bilong dispela lotu lain em ol i autim long wanpela rait insait long pablikesen bilong ol i gat namba, nem bilong em Pasugo, we em i tok olsem,
Translesen:
Ating i bin gat wanpela Kraist long stat bipo long God i bin wokim dispela graun? Bekim em i klia
bilong bihainim wanem samting ensel bin tokim Maria, olsem em bai kisim bel na karim wanpela
pikinini man husat nem bilong em ol bai kolim Jisas, Luk 1:31. I kam long bekim ensel bin givim, stap
bilong Kraist i bin stat insait long bel bilong Maria husat no bin slip wantaim man.
INC bilong Manalo em i tok olsem stap bilong Kraist i bin stat tasol taim ensel bin tokim Maria, “yu bai kisim bel insait long bel bilong yu.” Dispela i minim olsem bipo long Maria i kisim bel, i no gat Kraist husat i stap yet. Tasol sapos yu bai go antap long tok insait long Luk 1:31, “Na, lukim, yu bai kisim bel insait long bel bilong yu, na karim wanpela pikinini man, na yu bai kolim nem bilong em JISAS” yu bai luksave olsem dispela ves i no bin tok olsem stap bilong Kraist i bin stat tasol insait long bel bilong Maria.
Taim yu toktok long saiens, laip bilong man i no stat insait long bel bilong mama tasol long namel bilong bel bilong papa. Identity (wanpela man i husat) bilong wanpela man i stat long namel bilong bel bilong papa bilong em. Maski DNA bilong em, dispela em i plen bilong stap bilong yumi, em i kam long mama na papa bilong em wantaim, tasol, taim yu toktok long Baibel, wanem samting i kam long papa em i gat bikpela kaikai moa.
HIBRU 7:9-10 i tok,
9 Na olsem mi ken tok olsem, Livai tu, husat i kisim namba ten hap, i baim namba ten hap
insait long Ebraham.
10 Long wanem, em i stap yet insait long namel bilong bel bilong papa bilong em, taim em i
bungim Melkisedek.
Long spirit sait na long sait bilong saiens, Livai i bin stat long namel bilong bel bilong Ebraham. Em i bin stap pinis insait long namel bilong bel bilong Ebraham 450 yia bipo long mama karim em. Dispela i minim olsem taim yu toktok long saiens, DNA bilong wanpela ken kam long longwe inap namba seven inap long namba ten lain tumbuna i go bek.
Bilong bihainim saiens, wanpela sel i stap laip i kamap ausait long 23-pela chromosome (bung bilong ol DNA) i kam long papa na narapela 23-pela chromosome i kam long mama. Tru tru, olgeta sel insait long bodi bilong yumi, olsem ol sel insait long ol bun bilong yumi, insait long ol ligemen (samting bilong holim ol bun long ples bilong ol), insait long mit bilong yumi, i go, ol i gat 46-pela chromosome. Sperm cell (sel bilong man bilong kamapim pikinini) bilong wanpela man na egg cell (sel bilong meri bilong kamapim pikinini) i kam long wanpela meri, olgeta wan wan bilong ol tasol i gat 23-pela chromosome. Olgeta narapela sel i gat 46. Tasol taim sperm cell na egg cell i bung na kamap wanpela, wanpela nupela sel wantaim 46-pela chromosome i kamap. Bihain dispela nupela sel bai kamap wanpela fetus (liklik bebi tru insait long bel), dispela mama bai karim olsem wanpela nupela man bihain long 9-pela mun.
Poin mi traim long soim em i olsem. Maski Livai bai bon yet 450 yia bihain, em i bin stap pinis insait long namel bilong bel bilong Ebraham. Em i minim, dispela DNA i stap pinis insait long Ebraham bai pasim i go long Livai 450 yia bihain. Long pruvim olsem long bodi sait na long sait bilong saiens, tru tru ol stap bilong yumi i no stat long bel bilong ol mama bilong yumi. Long dispela as em i rong long sait bilong saiens long tok olsem stap bilong Kraist i bin stat tasol taim Maria i bin kisim bel long Em insait long bel bilong en. Na em i rong tru tu, taim yu toktok long spirit sait. Bilong wanem? Bikos stap bilong Kraist i no bin stat hia long Dispela Graun!
HIBRU 10:5 i tok,
Olsem na taim Em i kam long dispela graun, Em i tok, Sakrifais na ofa Yu no laikim, tasol
wanpela bodi Yu bin redim long Mi.
Dispela ves i toktok long Bikpela Jisas Kraist. “taim Em i kam long dispela graun” i minim olsem Em i no bin stat long dispela graun. Tasol taim Em i bin kam long dispela graun, God i bin redim wanpela bodi long Em. Dispela em i wanem bodi? Em i dispela bodi Maria i bin kisim bel long en. Dispela em i dispela bodi i bin stat i kam long Maria – dispela bodi bilong Kraist long bodi sait.
JON 1:14 i tok,
Na dispela Tok i kamap Man…
Sapos Kraist i no bin stat long dispela graun, orait long wanem hap?
MAIKA 5:2 i tok,
Tasol yu, Betlehem Efrata, maski yu stap liklik namel long ol tausen bilong Juda, yet ausait
long yu bai em i kam ausait i kam long Mi husat i mas stap hetman bilong Isrel, husat ol
wokabaut i go ausait bilong em em i bin bilong bipo, bilong oltaim oltaim bipo.
Bilong bihainim tok profet bilong Maika, i kam long Betlehem Em husat bai bosim Israel bai kamap, na dispela hetman i bin kam long oltaim oltaim bipo, we Papa i bin kamapim Em.
SAM 2:7 i tok,
Bai Mi autim dispela lo, BIKPELA i bin tokim Mi olsem, Yu Pikinini Man bilong Mi. Long dispela
de Mi bin kamap papa bilong Yu.
Papa i bin kamapim Kraist, na em i dispela wanpela samting tru i stap long Baibel sampela lain i tok nogat long bilipim. Tasol dispela em i tok tru. Papa i bin kamapim Pikinini Man bilong Em bipo long kamapim long nating dispela graun.
JON 3:6 i tok,
Dispela samting bodi i karim em bodi. Na dispela samting Spirit i karim em spirit.
Em husat bodi i karim em i bodi. Na em husat Spirit i karim em i spirit. Orait spirit inap karim spirit.
HIBRU 12:9 i tok,
Na moa tu yumi bin gat ol papa bilong bodi bilong yumi husat i stretim yumi, na yumi givim ol
biknem tru. Ating em i no mobeta moa long yumi ken stap aninit long Papa bilong ol spirit, na
stap laip?
God Papa Em i wanpela spirit. Ol i kolim Em tu, “Papa bilong ol spirit.” Long as tru bilong em, God ol i kolim Papa bilong ol spirit bikos Em i bin kamapim Pikinini Man bilong En olsem wanpela spirit i stap na Em i bin kamapim long nating ol spirit i stap olsem ol ensel!
JON 4:24 i tok,
God em i wanpela Spirit. Na ol husat i lotuim Em i mas lotuim Em long spirit na long pasin i
tru.
Inap long yumi bai no paul, oltaim yumi mas tingim olsem i gat tupela samting i stap insait long Kraist: namba wan, dispela Spirit Papa i bin kamapim, na namba tu, dispela bodi Maria i bin karim. Em husat i bin kam insait long dispela graun Em i dispela Pikinini Man bilong God husat Papa i bin kamapim, long spirit sait, long oltaim oltaim bipo. Na taim Pikinini Man bilong God i bin kam insait long dispela graun, Em i bin stap insait long bodi bilong dispela pikinini man Maria i bin karim.
Wanem samting INC bilong Manalo i haitim long ol memba bilong em em i dispela samting tru insait long Baibel olsem Papa i gat wanpela Pikinini Man husat Em Em Yet i bin kamapim.
HIBRU 1:4-6 i tok,
4 Taim God i mekim Em stap gutpela moa tru long ol ensel, olsem Em i bin kisim long samting
papa i givim pikinini wanpela nem i gutpela moa olgeta long ol.
5 Long wanem, long husat bilong ol ensel Em i tok long wanpela taim, Yu stap Pikinini Man
bilong Mi, dispela de Mi bin kamapim Yu? Na gen, Mi bai stap long Em wanpela Papa, na Em
bai stap long Mi wanpela Pikinini Man?
6 Na gen, taim Em i bringim namba wan Pikinini Em i kamapim i kam long dispela graun, Em i
tok, Na larim olgeta ensel bilong God lotuim Em.
Namba wan pikinini Papa i bin kamapim Em i Kraist, na God i bin bringim Em i kam insait long dispela graun tasol. Em i no bin stat hia bikos Em i bin kam long oltaim oltaim bipo.
Nau, Kraist i bin stap we bipo long Papa i bin kamapim o karim Em?
JON 1:18 i tok,
I no gat man i bin lukim God long wanpela taim, dispela wanpela God tasol Em i kamapim,
husat i stap long bel bilong Papa, Em i bin tokaut long Em.
Kraist i bin kam long bel bilong Papa na Em i dispela wanpela tasol Papa i bin kamapim.
New American Standard Bible i tanim mobeta JON 1:18 bikos em i bihainim Baibel long tok Grik. Em i tok,
No one has seen God at any time; the only begotten God, who is in the bosom of the Father,
He has explained Him.
Long nambawan tru rait long tok Grik, em i tok “dispela wanpela God tasol Em i bin kamapim.”
IΩANNHN 1:18 (Wescott-Hort long tok Grik taim ol i tanim olgeta wan wan leta long Inglis):
Theon oudeis eoraken popote monogenes theos o on eis ton kolpon tou patros ekeinos
exegesato.
“MONOGENES THEOS” = God husat Em i bin kamapim
Kraist i bin stap insait long bel bilong Papa. Em i bin stap wanpela hap bilong Stap bilong Papa long oltaim oltaim. Tasol, taim i bin kam olsem Papa i mas karim Em.
JON 17:5,24 i tok,
5 Na nau, O Papa, Yu givim glori long Mi wantaim Yu Yet wantaim dispela glori Mi bin gat
wantaim Yu bipo long dispela graun i stap.
24 Papa, Mi gat laik long ol tu, husat Yu bin givim Mi, i ken stap wantaim Mi we Mi stap. Inap
long ol i ken lukim glori bilong Mi, dispela Yu bin givim Mi. Long wanem, Yu laikim Mi tru bipo
Yu slipim ol as ston bilong dispela graun.
Bipo long kamapim long nating dispela graun, Kraist i bin kisim na amamas pinis long dispela glori i bin kam long Papa. Dispela em i wanem samting? Em i dispela glori bilong stap Pikinini Man bilong God. “Yu pikinini man bilong mi,” Papa i bin tokim Em, bikos Em i dispela wan husat i bin karim Kraist. Em i bin kamapim Em.
Wanem samting ol narapela i gat tupela tingting long en em i long Papa inap long karim wanpela pikinini man bikos Em i wanpela man (i no meri) tasol.
Tru tru, i gat rot long wanpela man inap long karim pikinini long bodi na spirit sait wantaim.
Long bodi sait, wanpela man inap karim pikinini.
Em i seahorse (kain animal bilong solwara i luk olsem wanpela liklik hos) man husat i save gat bel na karim pikinini.
Sapos i gat rot long wanpela man inap long karim pikinini long bodi sait, moa yet olgeta i gat rot long em long spirit sait. God I Gat Olgeta Strong, na bikos Em i wanpela God I Gat Olgeta Strong, mi no ting em bai hatpela long Em long karim o kamapim wanpela Pikinini Man.
SAM 94:9 i tok,
Man i bin wokim ia, ating bai Em i no harim, a? Man i bin wokim ai, ating bai Em i no lukim, a?
Ol man inap long lukluk na harim. Ol dispela strong i bin mekim man painimaut ol dispela as tingting i bosim ol sens bilong lukluk na harim bilong yumi, dispela yumi bin yusim bihain taim yumi bin wokim kemra, wanpela ai i kisim ol piksa, na maikropon, wanpela yau i harim na i toktok strong long wanem samting em i harim.
Sapos yumi ol man, maski yumi gat mak bilong strong, yumi inap long kamapim ol samting i mekim ol man i tingting planti olsem kemra na maikropon, hamas moa God I Gat Olgeta Strong! “Man i bin wokim ia, ating bai Em i no harim, a? Man i bin wokim ai, ating bai Em i no lukim, a?” Bilong bihainim ol dispela lain, ating yumi no inap askim, “Em husat i bin wokim bilum bilong pikinini, ating bai Em i no inap long karim pikinini, a?” Tru tru i gat rot long dispela wantaim God.
Stap bilong Bikpela Jisas Kraist i bin stat long oltaim oltaim wantaim Papa. Tru tru, tupela i bin stap wantaim long taim bilong kamapim long nating dispela graun.
PROVEP 30:4 i tok,
Husat i bin go antap long heven, o kam daun? Husat i bin bungim win long ol han bilong en i
pas bilong pait? Husat i bin pasim ol wara long wanpela klos? Husat i bin strongim olgeta hap
bilong dispela graun? Wanem em i nem bilong Em, na wanem em i nem bilong pikinini man
bilong Em, sapos yu inap long tokaut?
Papa na Pikinini Man Ol i ol dispela lain husat i bin kamapim long nating olgeta samting, man tu wantaim. Taim God i bin kamapim long nating namba wan man, Jenesis 1:26 i tok, “Na God i bin tok, Larim Yumi wokim man long piksa bilong Yumi, i bihainim lukluk bilong Yumi…” Ol dispela hap tok “yumi” na “bilong yumi” i minim olsem Papa i bin toktok wantaim narapela husat i bin stap wantaim Em, na dispela em i Pikinini Man bilong Em husat Em i bin kamapim long oltaim oltaim bipo.
Wanem samting INC bilong Manalo i no inap kisim em i pasin bilong stap God bilong Bikpela Jisas Kraist. Long ai bilong ol, i gat wanpela God tasol, na dispela em i Papa. Mi no tok nogat long i gat wanpela God, tasol yumi mas mekim klia husat em i dispela wanpela God insait long Baibel. Tok Hibru ol i bin yusim em i Elohim, dispela em i minim planti bilong hap tok Eloah, we dispela i minim God. Olsem na, Elohim i minim ol God. Elohim i bin tok, “Larim Yumi wokim man long piksa bilong Yumi.”
I gat wanpela Elohim tasol, tasol insait long dispela wanpela Elohim i stap i no Papa tasol. Wankain olsem wanpela band bilong pilai musik. Maski yumi kaunim wanpela band bilong pilai musik olsem wanpela, tasol sampela lain bilong pilai musik i stap insait long em. Nogut insait long em i gat wanpela man bilong pilai kibod, wanpela man bilong pilai gita, wanpela man bilong paitim dram, wanpela man bilong pilai violin, wanpela man bilong winim biugel, i go, tasol yumi kolim em wanpela band. Em i wankain olsem wantaim famili, dispela tu i toktok long wanpela, tasol insait long wanpela famili, i gat papa, mama, ol pikinini, na ol tumbuna papamama i stap.
Mi traim long tok wanem? Dispela wanpela God Baibel i toktok long en Em i kam long hap tok Hibru Elohim, we dispela i minim planti lain stap insait. Em i minim olsem, i no Papa wan tasol i stap. Nogat. Insait long Elohim, Papa, Pikinini Man, na Holi Spirit i stap.
Mi klia tru olsem dispela em i sampela samting i no gat wanpela taim ol minista bilong INC bilong Manalo bai skulim ol memba bilong ol. Na ol bai no ritim JON 1:18 long ol long dispela nambawan tru vesen long tok Grik we em i kolim Kraist olsem “Monogenes Theos” o “dispela wanpela God tasol Em i bin kamapim” bikos em bai brukim dispela skul tok bilong ol bilong moa long handet yia olsem Kraist Em i wanpela man tasol husat stap bilong em i bin stat taim Maria i bin kisim bel long Em insait long bel bilong en.
Tasol, ol dispela ves mi bin kolim ol i moa long inap bilong pruvim olsem stap bilong Kraist i no bin stat insait long bel bilong Maria bikos bipo long em i kisim bel, Em i bin stap pinis wantaim Papa long oltaim oltaim bipo. Em i bin stap wantaim Papa long taim olgeta bilong wokim olgeta samting, na Em i wanpela husat i gat pasin bilong stap God – Baibel i kolim Em “dispela wanpela God tasol Em i kamapim” o “Monogenes Theos.” AMEN!
Tok Lukaut: Ol lain bilong tanim tok bilong mipela ol i lukaut na yusim gut tru save bilong ol taim ol i bin tanim dispela blog i go long Tok Pisin. Tasol, ControversyExtraordinary.com i no tok olsem olgeta infomesen ol i bin tanim i no gat asua bikos long sampela ol samting. Taim i gat sampela asua namel long rait i nambawan tru i stap long tok Inglis na rait ol i bin tanim long Tok Pisin, rait i nambawan tru i stap long tok Inglis i winim narapela oltaim.
0 comments: