Sapos i gat wanpela samting yumi noken givim baksait long mekim olgeta wan wan de bilong ol laip bilong yumi, em i long prea oltaim na givim tenkyu long God.

Taim yumi kirap olgeta wan wan moning, nambawan toktok bilong yumi mas wanpela tokaut bilong pilim bilong givim tenkyu long God. Yumi mas pulap long pilim bilong givim tenkyu long wanpela nupela de Em i givim yumi bikos olgeta wan wan moning i soim sori na pasin bilong soim sori i no inap fel bilong Em i go long yumi.

Krai Sori 3:22-23 i tok,

22 Em i bilong ol sori bilong BIKPELA long ol i no kaikai yumi olgeta, bilong wanem, ol pasin sori bilong En i no save fel.

23 Ol i stap nupela olgeta wan wan moning. Pasin bilong mipela i ken bilip long Yu em i bikpela.

Long ol taim i pulap long hevi olsem dispela, taim dispela graun olgeta i pulap long hevi long wanpela bikpela bagarap, yumi nidim sori na pasin bilong soim sori bilong God nau moa long bipo. Planti man i dai olgeta wan wan de na yumi nidim tasol long pilim tenkyu planti moa yet olsem God i no larim yumi kamap wanpela bilong ol. Long marimari na pasin bilong soim sori i no inap fel bilong Em, yumi go yet long stap laip, stap gut, na amamas yet long poroman pasin bilong ol lain i stap klostu tru long bel bilong yumi. Na em i bikos tu long sori na helpim bilong Em olsem na yumi inap long winim ol dispela salens, ol taim ol samting i no klia, na ol hevi yumi bungim olgeta wan wan de.

Sori na pasin bilong soim sori bilong God i nupela olgeta wan wan moning. Long dispela as, long olgeta wan wan moning God i givim yumi, yumi inap hop tu long pasin bilong soim sori na sori bilong Em. Em i bikos long sori bilong Em olsem na God i kisim bek yumi long bagarap olgeta dispela bikpela bagarap i kamapim.

Tru i gat bagarap olgeta bai i kamap long ol man nogut, long ol man husat i sakim tok na bikhet i birua long God.

Tasol ol husat i luksave na pret long God i inap hop long sori na pasin bilong soim sori bilong Em, ol dispela Em i givim nupela long ol olgeta wan wan nupela moning.

Ol man husat i stap aninit long lukaut bilong God na Bikpela Jisas Kraist i gat strongpela bilip long lukaut (bilong God), na Bikpela Jisas Kraist Em Yet i givim dispela strongpela bilip.

Long Jon 10:28-29, em i tok,

28 Na Mi givim ol laip i stap gut oltaim oltaim. Na ol bai i no inap lus, na tu i no gat wanpela man bai kamautim ol ausait long han bilong Mi.

29 Papa bilong Mi, husat i givim ol long Mi, i winim olgeta. Na i no gat man husat i inap long kamautim ol ausait long han bilong Papa bilong Mi.

Tasol ol husat i no bilip long God, ol husat i tok bilas long Baibel olsem ol atheist (man i no bilip long i gat God i stap) i mekim, na ol husat bilip bilong God em i samting nating tasol mauswara nating na ol i no soim ples klia long ol wok, God i makim olgeta dispela long dai olgeta na bagarap olgeta.

Olsem em i stap pinis long rait insait long 2 Pita 2:12,

Tasol ol dispela, olsem ol animal bilong dispela graun, husat God i wokim bilong ol i ken kisim na bagarapim olgeta, i toktok nogut long sait bilong ol dispela samting ol i no save long en. Na ol bai dai olgeta long ol pasin bilong bagarap bilong ol yet.

Yumi prea tasol long God olsem bipo em i bihaintaim tumas, bipo bagarap olgeta i kam long ol man i no bihainim God, olsem bilip long God na long Bikpela Jisas Kraist bai kamap insait long ol bel bilong long taim bihain klostu olgeta em i ken kamap inap long God bai kisim bek ol.

Taim dispela bikpela bagarap i mekim ol manmeri bilong dispela graun long kamap sik nau, yumi no klia sapos yumi bai stap laip yet tumora o long ol de bihain. Yumi no klia tru sapos yumi bai kamap pinis wanpela bilong ol handet tausen husat dispela sik i kilim i dai. Yumi save olsem God i makim olgeta wan wan bilong yumi long dai, na wanpela askim tasol em i husat bai dai pastaim.

King Devit i bin save olgeta olsem God i makim olgeta man long dai na olsem ol laip bilong yumi i stap long tupela han bilong God. Long dispela as, taim em i bin save olsem God i bin makim long dai pikinini man bilong em husat i bon nupela taim long narapela meri, em i bin tambuim kaikai na prea long God bilong tingim laip bilong pikinini man bilong em.

Tasol taim dispela samting God i makim i kamap pinis, taim dai bilong bebi i kam olgeta, em i bin pinisim long tambuim kaikai na i go long haus bilong Bikpela na lotuim Em, wanpela pasin bilong Em bilong stap aninit long laik bilong God. Em i save olsem em i no inap kirapim gen pikinini bilong em. Em i save tu olsem taim dispela taim God i makim i kam, em tu bai dai.

2 Samyuel 12:23 i tok,

Lain manmeri bilong God i save olsem wanpela de, ol bai dai. Em i wanpela samting God i makim long olgeta man.

Olsem em i stap pinis long rait insait long Hibru 9:27,

Na olsem God i bin makim long ol man i mas dai wanpela taim, tasol bihain long dispela i gat kot,

God i bin makim olgeta man long dai. Tasol yumi noken prea, o askim, long dai bilong ol narapela, maski sapos ol i stap ol birua bilong yumi i hatpela olgeta long kisim. God i givim strongpela tok long yumi long prea bilong helpim ol birua bilong yumi, i no long dai o bagarap bilong ol. Tasol yumi no inap abrusim olsem tru i gat ol man husat amamas bilong ol i stap long bagarapim nem bilong ol narapela na long salim i go nabaut ausait ol giaman nius long sait bilong ol long social media. Mi, mi yet, i kisim hevi long ol dispela kain man. Ol i bagarapim nem bilong mi. Ol i putim toksave tu olsem mi sik nogut tru na i laik i dai long social media.

Mi tingting planti sapos ol dispela man i no gat wanpela wok i gutpela moa bilong mekim. Mobeta long mekim ol yet bisi long ol samting i no bihainim gutpela tingting olsem wokim na salim i go nabaut ausait ol giaman nius, bilong wanem ol i no traim mekim sampela samting bilong helpim ol narapela, moa yet nau taim milien milien man na meri i karim pen na i nidim tru helpim?

Mi askim tu wantaim daun pasin sampela o lain bilong midia, ol politisen, na ol lida bilong gavman. Mobeta long painim asua na sutim tok wanpela i go long narapela, bilong wanem yupela i no wok bung wantaim bilong helpim olgeta man? Dispela i no taim bilong toktok long asua na tok birua wanpela i go long narapela. Dispela tu i no taim bilong tingting long sait bilong ol driman long politiks na ol narapela tingting bilong yupela yet. Dispela em i taim bilong kamap wanbel, i no long paitim dispela pait agens long dispela bikpela sik tasol tu long givim han long ol husat i kisim bikpela bagarap long dispela ol lockdown (taim gavman tambuim ol man long stap insait long haus tasol) na community quarantine (taim wanpela komuniti bai stap tasol long ol haus bilong ol bilong pasim sik long go nabaut ausait) i kam long tok strong bilong gavman.

Bikos long ol lockdown, planti man nau i karim hevi long hangre. Planti i hop tasol long ol kaikai samting gavman na ol narapela i givim long ol bilong helpim ol olgeta wan wan de. I gat ol lapun husat i nidim ol marasin bilong mekim ol i stap orait tasol ol i no inap baim ol. I gat ol bebi na ol liklik pikinini tru husat i nidim milk na ol bambam tasol ol i no inap long kisim wanpela bikos ol papamama bilong ol i sot long mani. Na i gat tu sampela lain husat i karim hevi pinis long bikpela wari tru bikos ol i no inap long pesim ol dispela hevi ol i bungim.

Long dispela as, mobeta long westim taim, strong, na ol mani samting long ol toksave bilong politiks, long sutim tok agens long wanpela birua long politiks, o long salim i go nabaut ausait ol giaman nius long social media, em i gutpela moa olsem yumi yusim taim bilong yumi long tekewe ol hevi bilong ol dispela manmeri i pulap long wari na i stap rabisman tru. Wanpela liklik helpim ken kamapim bikpela gutpela long ol.

Gavman i nidim olgeta wan wan long helpim na wok wantaim long pesim dispela sik i inap kalap hariap na long helpim sindaun bilong ol manmeri. Maski gavman i yusim olgeta kain rot bilong givim ol nambawan nid bilong ol manmeri, i gat mak bilong wanem samting gavman i inap long mekim. I gat pinis bilong ol samting bilong yusim bilong gavman. Tru, em i laik pinis. Olsem na, gavman i nidim helpim bilong ol lain i no wok long gavman, moa yet olgeta helpim bilong ol lotu lain.

Em i taim stret olsem ol lida bilong narapela narapela lotu lain, ol dispela lain husat i tok olsem ol yet Kristen, i pruvim long ol memba bilong ol olsem tru ol i wari long ol na ol i no laikim ol mani ol i givim tasol. Ol lotu lain husat ol lida na ol minista bilong ol i stap wantaim ol naispela samting, ol i mas givim ol nambawan nid bilong ol memba bilong ol wan wan. Na bikos ol i no baim takis long gavman, liklik samting olgeta ol i ken mekim em i long lukautim ol nid bilong ol memba bilong ol husat i stap rabis, maski ol dispela nid i long bodi sait o long sait bilong mani.

Wanpela samting mi hambak tru long en long sait bilong lotu bilong mipela, Sios bilong God Intenesenel, em i olsem. Maski mipela i stap rabis na liklik long ai bilong ol narapela, mipela i was gut olsem i no gat wanpela bilong ol brata na ol susa long bilip bai stap hangre, askim long kaikai long rot, o dai taim i no gat man i was long em. Ol wanwok bilong mipela ol wokman bilong Sios i kisim strongpela tok bilong sekim sindaun bilong ol brata na ol susa husat i stap rabis insait long ol hap we mipela i bin makim ol long en, na givim long ol ol nambawan nid bilong ol olsem kaikai na ol marasin.

Poin bilong mi em, long liklik rot bilong mipela, yumi inap tekewe ol hevi bilong ol narapela man husat i stap tarangu na yumi inap wok wantaim gavman long ol wok bilong helpim ol man.

Maski yumi stap ol manmeri nating bilong kantri bilong yumi, yumi inap givim han long pasim dispela nupela koronavaires long go nabaut ausait taim yumi redi na bihainim ol tok strong bilong ol ofisa bilong gavman na ol saveman bilong helt. Sapos ol i tokim yumi long stap long haus na noken raun nating, orait yumi ken stap long haus. Sapos ol i wokim tingting long mekim taim bilong quarantine long kamap longpela moa, yumi noken birua long em. Em i bilong helpim yumi yet.

Tru tru, as tingting bilong quarantine o self-isolation (man bai stap wan tasol na em bai no bung wantaim ol narapela pastaim) i sanap antap long tok bilong Baibel.

Livai 13:46 i tok,

Bilong pasim bikpela bagarap long go nabaut ausait, God i bin tokim ol Isrel long “stap wanpis.”

Long narapela buk, ol i bin kisim strongpela tok long go insait long ol rum bilong ol na stap wanpis inap long bikpela bagarap i go pinis.

Aisea 26:20 i tok,

Yumi inap tok olsem ol dispela samting gavman na ol man i gat namba long helt i tok strong long mekim tru ol i no nupela. Ol i stap olpela olsem Olpela Testamen.

Long 2 Stori 26:21 em i tok,

Inap long de bilong dai bilong em, King Hosea i bin stap wanpis bikos em i bin gat sik lepra. Em i bin mekim em yet i stap longwe long olgeta narapela bilong ol manmeri inap long em bai no givim sik long ol.

Taim yumi tingim na skelim olsem sik COVID-19 i inap kilim i dai ol man moa na i isi long pasim i go long narapela moa long sik lepra, orait ol man bilong dispela taim i mas bihainim self-quarantine o self-isolation. Yumi ken strong long bihainim ol dispela pasin long sait bilong helt ol man husat i gat namba i givim tingting long mekim. Yu stap long haus em i rot i gutpela olgeta bilong i no kisim sik. Tasol sapos yu soim ples klia kain ol mak stret, go lukim ol man i gat save long helt wantu, maski kain kain rot bilong komunikesen i stap pinis bilong yusim nau. UNTV, kain olsem, i gat wanpela klinik i stap onlain 24 aua na 7-pela de long wik, insait long dispela yu ken askim ol dokta long sait bilong ol wari bilong yu long helt we yu no nidim long go ausait long haus bilong yu.

Tru tumas, taim gavman i tok strong long ol lockdown na ol quarantine, i gat ol samting dispela i kamapim, moa yet long ol wokman nating na ol lain husat i kisim pe olgeta wan wan de. Tasol em i samting bilong makim ol samting i stret tasol. Em i mobeta olsem yu stap long haus na stap hangre wan wan taim, tasol yu stap orait na stap laip yet. Noken komplen olsem yu pilim les long haus. Bilong wanem yu bai pilim les taim yu stap wantaim ol lain i stap klostu tru long bel bilong yu? Yusim gut taim bilong community quarantine taim yu pas wantaim famili bilong yu. Em i nogat samting sapos yu no gat mani nau. Laip bilong yu i bikpela samting moa long wanpela paus i pulap long mani. Sapos yu strong long go nabaut na traim long wok mani, yu putim yu yet na ol memba bilong famili bilong yu long dispela sans bilong kisim bagarap. Yu no klia tu sapos dispela mani yu bai kisim yu bai yusim tasol long hausik sapos yu kisim dispela vaires i inap kilim man i dai. Na taim yu kisim sik, yu no klia sapos yu bai inap long kamap orait, olsem na bilong wanem bai yu traim taim yu inap stap gut taim yu stap long haus?

Tasol ausait long mekim olgeta samting yu mas mekim bilong abrusim sik, samting bilong yumi bilong pait i strongpela olgeta em i ol prea bilong yumi long God I Gat Olgeta Strong. Long olgeta wan wan sans Em i givim yumi, olsem moning, belo san, avinun, nait, yumi ken prea long sori bilong God. Tingim, sori na pasin bilong soim sori bilong God i no inap fel long ol husat i pret na bilip long Em. Ol i nupela olgeta wan wan moning.

Olsem na, olgeta wan wan moning yumi kirap, yumi noken fel long givim tenkyu long God long Em i givim yumi narapela sans bilong kisim sori bilong Em. Em i bikos long sori bilong Em olsem na yumi stap laip yet inap long nau.

Tenkyu i go long God!