Kain Sik I Stap Long Planti Hap Olsem Coronavirus: Olsem Wanem Ol Kristen Mas Redi?
Ol sik nogut, ol samting nogut i kamap long nature, ol woa na taim ol sin nogut bilong man i kamap nogut moa long wanpela kain mak man i no tingting long en bipo, ol dispela em i ol mak bilong taim Bikpela Jisas Kraist i laik kam. Kraist, Em Yet, i bin toksave pastaim long dispela long ol Aposel bilong Em taim ol i bin askim Em, “Wanem samting bai kamap mak bilong taim yu laik kam?”
MATYU 24:4-7 i tokim yumi wanem samting Bikpela Jisas Kraist i bin tokim ol:
4 Na Jisas i bekim na tokim ol, Was gut long i no gat man i giamanim yupela.
5 Long wanem, planti bai kam long nem bilong Mi, i spik, Mi stap Kraist. Na ol bai giamanim planti.
6 Na yupela bai harim long ol bikpela pait na ol tok win bilong ol bikpela pait. Luksave long yupela i
no pilim wari. Long wanem, olgeta dispela samting mas kamap olsem, tasol pinis i no yet.
7 Long wanem, kantri bai kirap i birua long kantri, na kingdom i birua long kingdom. Na bai i gat ol
bikpela taim hangre, na ol sik nogut, na ol guria, long ol kain kain ples.
Bikpela Jisas Kraist i bin tok olsem bipo long Em i kam, bai i gat ol bikpela hangre, ol sik nogut, na ol guria. Wanpela pruf olsem Baibel i stap tru na ol toktok bilong Bikpela Jisas Kraist insait long em olgeta i tru em i olsem, tru tru yumi wok long bungim ol dispela samting nau, wantaim ol woa o dispela taim ol kantri i kirap i birua long ol narapela kantri. Na yumi save olsem ol woa na ol samting nogut i kamap long nature ol i ken mekim moa ol hevi olsem taim bilong hangre long kamap.
Kraist i bin givim dispela tok profet stret ol tausen yia bipo. Long dispela taim, yu no inap tingting long bai i gat taim ol man bai stap hangre bikos ol man bilong askim samting long rot tu bipo i gat sampela samting bilong kaikai.
Tasol nau, kaikai i kamap wanpela bikpela hevi tru. I gat ol man nau husat i no inap kaikai long wanpela de. Yumi harim tu ol stori long sait bilong ol man husat i dai long hangre.
Tasol wanem samting bai mekim yu kirap nogut em i olsem. I gat ol dispela sik nogut nau man i wokim. Kain olsem, long Siria ol i bin yusim sampela samting i luk olsem ol i laik yusim long dispela kain pait ol i kolim biological (we ol i yusim ol samting i gat laip olsem samting bilong pait) na chemical (we ol i yusim ol marasin nogut olsem samting bilong pait) warfare, sampela samting inap pinisim olgeta ol man wantu. Wanpela video long Internet i soim olsem taim wanpela man i pulim kain samting wantaim win, em i karim pen taim ai bilong em i tanim o bodi bilong em i tantanim na bihain long sampela taim, em i dai.
I no gat tupela tingting olsem olgeta dispela samting nogut bilong kamapim bikpela bagarap, yumi lukim nabaut long yumi nau, ol i ol mak bilong taim Bikpela Jisas Kraist i laik kam. Askim em i olsem. Olsem wanem yumi bai redi long dispela de bilong Bikpela?
2 PITA 3:10-11 i tok,
10 Tasol de bilong Bikpela bai kam olsem stilman long nait. Insait long dispela ol heven bai pinis
olgeta wantaim wanpela bikpela nois, na ol samting bai kuk i kamap olsem wara wantaim hat i
hatpela tru, dispela graun tu na ol dispela wok i stap insait long en bai kuk olgeta.
11 Taim yumi luksave nau long olgeta dispela samting bai pinis olgeta, i gutpela moa long yupela mas
stap wanem kain manmeri long olgeta pasin holi na pasin i bihainim God,
Dispela pasin bilong redi yumi mas mekim em i noken kamap dispela kain pasin bilong redi ol narapela i wok long mekim. Ol i wok long redim ol dispela ples hait aninit long graun ol i bilip olsem inap givim wanpela ples bilong haitim na holimpas ol.
Long Singgapo, kain olsem, i gat ol haus wantaim ol ples bilong hait long bom i stap aninit long ol pinis. Tru tru, kain ol ples hait i no inap holimpas olgeta yumi bikos yu inap bagarapim ol olgeta. Olsem na, wanem dispela kain pasin bilong redi yumi mas mekim?
Bikpela Jisas Kraist, long rait bilong Aposel Pol, i bin tok olsem bilong redi yumi mas bihainim wanpela laip i holi na i bihainim God. Kraist i gat laik long yumi bihainim wanpela holi laip i pulap wantaim pasin bilong soim sori long ol narapela, moa yet long ol rabisman, long ol meri husat ol man bilong ol i dai pinis na long ol pikinini husat ol papa bilong ol i dai pinis. Yumi mas givim wanpela hap bilong yumi yet long ol.
Narapela video ol i bin salim i go antap long Internet em i bin soim olsem i gat ol pikinini long kantri Heiti husat i kaikai ol kuki ol i bin wokim long retpela graun. Wanem samting ol i mekim em i olsem. Ol i putim suga long wanpela miks bilong wara na retpela graun (dispela kain retpela graun ol man bilong wokim sospen i yusim) na wokim em long kamap ol kuki. Bihain, ol i putim ol dispela retpela graun kuki aninit long san long drai. Taim ol i drai pinis, ol pikinini i kaikai ol.
Taim mi bin lukim dispela vidio mi bin pilim wanpela sap pen long bel bilong mi. Olsem na wantu mi bin tokim wanpela bilong ol wokman bilong mipela insait long Sios long Latin Amerika long go long Heiti, long dispela ples stret we ol dispela pikinini husat i kaikai ol retpela graun kuki i stap long en.
Mi bin tokim em long painim wanpela ples long dispela hap ol i ken yusim olsem wanpela hap bilong givim kaikai long ol rabisman. Wantaim helpim bilong God, na taim mipela stretim tok wantaim dispela han bilong gavman long Heiti em i gat namba long dispela kain wok, dispela hap bilong givim kaikai em i ron pinis i stap. Na olgeta wan wan de, i gat planti manmeri husat i save go long hap, husat i sanap long lain bilong kisim ol pek bilong fri kaikai ol i kukim pinis.
Mi wok long skelim tu long kamapim dispela kain hap stret bilong givim kaikai long ol biktaun long Filipins bilong givim lukluk long nid long kaikai bilong ol pikinini na ol man bilong askim mani long rot, na tu bilong ol pikinini husat bodi bilong ol i no orait na i no gat man lukautim ol.
Sampela taim, mi pilim nogut long sait bilong ol maniman husat i givim kaikai long ol dok bilong ol wantaim ol bikpela hap mit, tasol ol i no inap ofaim yet sampela samting bilong kaikai long ol man husat i stap klostu long ol husat i stap hangre.
Em i luk olsem ol dok bilong ol maniman i stap orait moa moa yet long ol pikinini long rot. Bilong wanem? Ol maniman papa bilong ol dispela dok i no wari long tromoi bikpela mani long ol samting bilong givim kaikai na lukautim ol dok bilong ol. Ol i save bringim ol long ol dokta bilong animal olgeta taim. Ol i save givim vitamins (ol samting bilong helpim bodi long stap gut) long ol. Ol i save stretim bodi bilong ol. Na ol i save slip tu long ol rum wantaim air conditioner (masin bilong mekim win kol).
I no olsem ol dispela dok, ol pikinini long rot i nid long digim ol rabis bin long hop bilong painim sampela samting i ken pulimapim ol bel bilong ol. Ol i stap doti. Ol klos bilong ol i bruk nabaut. Na ol i slip long kol simen bilong rot bikos ol i no gat haus. Tru tru, yumi inap tok olsem yu bai jeles moa long ol laip bilong ol pet dok bilong ol maniman.
Tasol yu ting wanem samting stret bai amamasim bel bilong God: lukautim na givim gutpela kaikai tru long wanpela dok, o lukautim na givim kaikai long wanpela man bilong askim mani long rot o wanpela pikinini husat papa bilong em i dai pinis? Tru tru, God bai gat gutpela amamas sapos yu bai yusim mani bilong yu long sampela samting i ken tekewe hangre na ol hevi bilong ol narapela husat i stap ol rabisman, moa long yusim em long mekim gutpela pasin tru long ol dok bilong yu.
God i gat laik long yumi bihainim wanpela holi laip. Bilong kisim olsem, yumi mas stap laip bilong bihainim ol skul tok bilong Em, taim yumi no bihainim ol amamas nogut, pasin bilong kisim na yusim planti samting tumas, na ol samting bilong amamas bilong dispela graun. Tasol, Em i gat laik long yumi gat pasin bilong soim sori long ol narapela, moa yet long ol husat i gat nid.
Dispela stret em i wanem samting mipela insait long Sios bilong God Intenesenel i wok long traim long mekim. Mipela i mekim bes bilong mipela bilong inapim wanem samting God i laikim long mipela. Long dispela as mipela i bin putim wanpela fri klinik bilong painimaut sik bilong helpim ol husat i no gat mani bilong peim ol tes bilong dokta.
Mipela gat tu ol dispela skul we mipela baim olgeta samting bilong helpim ol sumatin husat i stap rabis tasol ol i fit long stadi. Na dispela helpim mipela i givim em i bilong baim skul fi na ol narapela fi, ol fri klos bilong werim long skul, fri kaikai, na yusim ol kompyuta na ol narapela samting fri bilong kisim save.
Mipela i save wokim tu oltaim ol wok bilong oraitim sik bilong ol man long kain kain hap bilong dispela graun we mipela i wokim wok bilong oraitim sik long bodi sait, long sait bilong ol tit, na ol ai, na tu mipela i givim ol vitamin na ol marasin. Na mipela i gat tu ol hap bilong lukautim ol pikinini husat ol papa bilong ol i dai pinis, ol bebi husat ol papamama bilong ol i bin lusim ol, na ol lapun.
Olgeta dispela fri wok na ol kain helpim mipela i givim long olgeta, we mipela i no bisi long wanem kain lotu o lain bilong ol.
Yumi no save wanem samting tumora ken bringim. Yumi no inap tok sapos tumora yumi bai stap yet. Yumi no save tu sapos, wanpela bilong ol dispela de, yumi tu bai kisim bagarap long ol samting nogut i kamap long wok bilong man o long nature. Na bikos long ol dispela samting yumi no klia long en, em i bikpela samting tru olsem oltaim yumi redi long wanem samting bai kam, moa yet olgeta long taim Bikpela Jisas Kraist i laik kam.
Tasol ausait long mekim ol wok bilong pasin holi na soim sori long ol narapela, em i gutpela olgeta olsem bipo long Bikpela i kam, yu bai inap long painim dispela trupela Sios we trupela bilip i stap, na we ol i bihainim strong trupela pasin bilong bihainim God.
GLORI I GO LONG GOD!
Tok Lukaut: Ol lain bilong tanim tok bilong mipela ol i lukaut na yusim gut tru save bilong ol taim ol i bin tanim dispela blog i go long Tok Pisin. Tasol, ControversyExtraordinary.com i no tok olsem olgeta infomesen ol i bin tanim i no gat asua bikos long sampela ol samting. Taim i gat sampela asua namel long rait i nambawan tru i stap long tok Inglis na rait ol i bin tanim long Tok Pisin, rait i nambawan tru i stap long tok Inglis i winim narapela oltaim.
0 comments: