Kontrak i Stap long Ol Hap Mit bilong Bel

July 04, 2019 0 Ol Toktok long Dispela


Mi laik givim spes long wanpela email, wanpela pasto bilong Seventh Day Adventist i bin salim kam long mi. Em i bin sutim tok long ol rait bilong mi long sait bilong ol skul tok bilong SDA Sios, moa yet dispela rait i gat nem olsem “Kranki Kontrak bilong Sios bilong Seventh Day Adventist”, mipela i bin putim long 5 Julai 2007. Email i tok olsem:

Dia Eli:

 Pastaim, mi tok sori tru long ol Seventh Day Adventist husat i kam wantaim pasin i no gat respek. Intanet em i wanpela rot ol man i ken yusim kranki isi tru na sampela i no klia inap olsem ol i mas mekim, ating, long autim bel bilong ol yet long wanpela kain rot we wanpela inap skelim pilim bilong man bilong rait.

 Mi interes long post bilong y una mi no klia olsem wanem yu bin kisim dispela email, tasol mi bin tingting long mi bai yusim liklik taim long bekim.

Yes, namba wan kontrak i bin gat asua na i no bin i go moa long diwai kros. Tasol askim i olsem, “namba wan kontrak em i wanem?” Sapos em i Tenpela Lo orait ol i lus pinis long diwai kros, tasol sapos nogat ol i gat namba yet. Wanpela kontrak, olsem mi klia long yu save gut tru long em, em i wanpela kontrak namel long tupela lain o moa. Dispela kontrak ol i bin kolim Olpela Kontrak em i olsem God i toktok long ol pikinini bilong Israel bai bihainim nek bilong Em (Ritim Exodas 19-24) na lain manmeri i bin tok (tripela taim) “olgeta toktok bilong God bai mipela i mekim” na las tokaut ol i bin skruim “na bai mipela i bihainim yet.” Moses i bin kisim blut bilong sakrifais na strongim (givim namba) dispela kontrak. Tenpela Lo bin i stap as ston, ol mak bilong mekim wok, bilong dispela kontrak, i no kontrak yet. Olsem na, ol i no bin lusim Tenpela Lo taim olpela kontrak i no bin gat namba moa.

 Lukim wanem samting yu bin makim gut tru insait long rait yu bin makim long Hibru, em i kam long Jeremaia 31:31-34. God bin tok olsem bai Em i mekim sampela samting insait long dispela nupela kontrak bilong lusim dispela tingting olsem Tenpela Lo i lus pinis long diwai kros. God Em yet i tok olsem bai Em i “putim ol lo bilong Em insait long tingting bilong ol na raitim ol long ol bel bilong ol.” I no olsem lo i lus pinis. Tasol em i kam na stap long rait insait long ol bel bilong ol manmeri. Olsem na, tenpela lo i no lus yet. Yumi save long dispela tu long samting i tru olsem insait long buk bilong Revelesen Jon i givim yumi tupela lukluk long lo insait long sapta 11 na 15 na dispela i stap long heven nau yet.

Olsem na, taim yu tok olsem no gat wanpela man i kamap holi long olpela kontrak yu tok stret. Tasol ol Seventh-day Adventist i no stap aninit long olpela kontrak. Ol i stap aninit long nupela olsem ol trupela lain bilong bilip tru husat i bin tanim bel o senis insait long Jisas Kraist. Ol wok bilong ol i no bin kisim bek ol. Pasin bilong bihainim lo bilong God ol i bin mekim, em i no bin kisim bek ol, tasol God i bin givim namba long ol long pawa bilong Spirit bilong En wantaim lo bilong En i stap long rait insait long ol bel bilong ol inap ol i stap laip long Em. Olsem na, wanpela bilipman husat i bin tanim bel i bihainim God i kam ausait long wanpela bel bilong laikim tru, taim em i putim bilip long gutpela pasin na ol sori bilong Jisas Kraist long as ston na bung bilong kisim bek bilong ol. Bikos ol Adventis i laikim tru God ol i gat laik long bihainim Em long olgeta toktok bilong Em na wanpela bilong ol dispela tok strong ol i amamas tru long bihainim em i namba foa long sait bilong tingim de namba seven i holi. Tasol pasin bilong bihainim dispela tok strong em i no wanpela trip bilong ol wok moa long, kain olsem, pasin bilong stap longwe long mekim pasin bagarapim marit long pasin pamuk long bodi sait o insait long bel bilong ol, o long pasin bilong stap longwe long pasin stil, i go i go.

 Pasin bilong laikim tru God i kamapim pasin bilong ol bilong bihainim lo na em i kaikai na pruf tasol bilong stap bilong ol taim ol i tanim bel pinis.

 Tru, sampela ol SDA i putim bilip long ol wok bilong ol inap God kisim ol, tasol ol i paul. Tasol lotu Adventis i no sapotim o skulim olsem pasin bilong man bilong bihainim i kisim bek em, tasol long wok bilong ol gutpela pasin bilong Jisas Kraist wan tasol na tu ol i skulim olsem i no gat kain samting olsem marimari i no dia. God i no save lusim sin bilong larim yumi long go yet long mekim sin, brukim ol tok strong bilong En tasol bikos ol i “no stap aninit long olpela kontrak moa.”

Nupela bel i gat hap insait long nupela kontrak. Esikiel 36:25-27 i tok olsem God i promisim wanpela nupela bel na Spirit bilong En bilong mekim yumi inap long bihainim laik bilong En, o lo bilong En. Ol Adventis i bilipim dispela na i gat laik long mekim olsem long marimari bilong God.

 Mi hop olsem dispela i helpim dispela toktok i bikpela tru na i gat nid long en na Bikpela i blesim yu. (I hope that this aids this very important and needed dialogue and the Lord bless you.) Insait long mekim wok i go long Em na long yu,

 Pastor Kevin James

 Ogden Seventh-day Adventist Church

Dia Pastor Kevin James,

Maski em i tru yu tok yes long namba wan kontrak i bin gat asua, na em i no go moa long diwai kros bilong Kraist, tasol yu tok olsem em i no Tenpela Lo. Tasol wanpela lukluk klostu moa long ol ves i kam bihain long Kolosi 2:14, bai yumi painimaut long pinis bilong toktok yu no inap abrusim olsem wanem samting i lus pinis em i Tenpela Lo wantaim ol lo God bin raitim na ol stretpela kot.

Kolosi 2:14-17
“Taim Em i rausim i go ol dispela lo Em i makim Em i raitim long han i birua long yumi, dispela i tok birua long yumi, na kisim dispela i go ausait long rot, taim Em i nilim dispela long diwai kros bilong Em. Na taim Em i bin bagarapim ol hetman bilong gavman na ol man i gat pawa, Em i wokim wok bilong soim ol ples klia, taim Em i winim ol tru long dispela. Olsem na no ken larim wanpela man jasim yupela long kaikai, o long dring, ol long sait bilong wanpela de holi, o long nupela mun, o long ol de sabat, Ol dispela em i tewel bilong san bilong ol samting bilong kamap bihain. Tasol bodi tru em i bilong Kraist.”

Lukim olsem yu no inap long jasim ol Kristen bihain long taim bilong rausim i go ol lo long sait bilong ol kaikai, ol dring, ol de holi, na ol Sabat, ol i ol tewel bilong san bilong trupela samting, em i Kraist. Kraist i stap Sabat bilong ol Kristen!

I no gat tupela tingting long namba wan kontrak em i dispela kontrak i stap long rait long tupela stretpela hap ston.

Lo 4:13
“Na Em i tokaut long yupela long kontrak bilong Em, Em i bin givim strongpela tok long yupela long mekim, em dispela tenpela lo. Na Em i raitim ol long tupela stretpela hap ston.”

Ol i kolim em tu olsem “Lo bilong Moses,” we em i gat ol lo God bin raitim na ol kot.

Malakai 4:4
“Yupela holim tingting long lo bilong wokboi bilong Mi Moses, husat Mi tok strong long em long Horep bilong helpim olgeta Isrel, wantaim ol lo Mi raitim na ol kot.”

Dispela Lo bilong Moses i gat ol lo God bin raitim na ol kot, em i wanem samting stret? Ol dispela God i bin tok strong long en i go long Moses long Horep i go long olgeta Israel. Ol dispela em i wanem ol samting stret?

Lo 5:1-22
“Na Moses i singautim olgeta manmeri bilong Isrel, na em i tokim ol, Harim O Isrel ol strongpela tok bilong God i stap long buk na ol tok bilong God long pe bilong kot mi tokaut long dispela de long ol long ol ia bilong yupela, bai yupela i ken kisim save long ol, na holimpas long ol na bihainim ol. God BIKPELA bilong yumi i bin wokim kontrak wantaim yumi long Horep. BIKPELA i no wokim dispela kontrak wantaim ol papa bilong yumi, tasol wantaim yumi, yes em yumi, em olgeta bilong yumi i stap hia long dispela de. BIKPELA i bin toktok wantaim yupela long pes i lukim pes long maunten na tok i kamaut long namel long paia. (Mi bin sanap namel long BIKPELA na yupela long dispela taim, long soim yupela tok bilong BIKPELA, long wanem yupela i pret na as bilong dispela em dispela paia. Na yupela i no go antap long maunten). Na Em i tok, Mi stap God BIKPELA bilong yu, na Mi bringim yu long lusim graun bilong Isip, long lusim ples bilong i stap kalabus. (1) Yu no ken bihainim ol arapela god long pes bilong Mi. (2) Yu no ken wokim bilong yupela wanpela piksa o wanpela piksa ol i sapim long wanpela samting i stap long heven antap o i stap long dispela graun daunbilo, o i stap long ol wara aninit long dispela graun. Yu no ken mekim yu yet i lindaun long ol o mekim wok long ol. Long wanem Mi God BIKPELA bilong yu em i jeles God, na Mi makim sin bilong ol papa i go long ol pikinini inap long tripela o fopela lain tumbuna pikinini bilong ol lain i no laikim tru Mi. Na Mi soim sori i go long ol tausen bilong ol manmeri i laikim tru Mi, na bihainim ol strongpela tok bilong Mi. (3) Yu no ken yusim nating nem bilong God BIKPELA bilong yu. Long wanem BIKPELA bai i no makim man klinpela sapos em i yusim nating nem bilong Em. (4) Bihainim de sabat long makim dispela, olsem God BIKPELA bilong yu i bin givim strongpela tok long yu. Sikispela de yu ken hatwok na mekim olgeta wok bilong yu. Tasol de namba seven em i sabat bilong God BIKPELA bilong yu. Long em yu no ken mekim wanpela wok, yu, o pikinini man bilong yu, o pikinini meri bilong yu, o wokboi bilong yu, o wokmeri bilong yu, o bulmakau bilong yu, o donki bilong yu, o olgeta bilong ol bulmakau samting bilong yu, o man bilong narapela hap i stap insait long dua bilong banis bilong yu, bai wokboi bilong yu na wokmeri bilong yu i ken malolo olsem yu mekim. Na holim tingting long yu bin i stap wokboi long graun bilong Isip, na long God BIKPELA bilong yu i bin bringim yu ausait long dispela hap long han i strong tru na long taim Em i taitim han. Olsem na God BIKPELA bilong yu i givim strongpela tok long yu long bihainim de sabat. (5) Givim ona long papa bilong yu na mama bilong yu olsem God BIKPELA bilong yu i bin givim strongpela tok long yu, bai ol de bilong yu i ken kamap planti moa na yu ken i stap gut long graun God BIKPELA bilong yu i givim long yu. (6) Yu no ken kilim i dai narapela. (7) Na tu yu no ken bagarapim marit long pasin pamuk. (8) Na tu yu no ken stil. (9) Na tu yu no ken mekim tok giaman long kotim man i stap klostu long yu. (10) Na tu yu no ken mangal long kisim meri bilong man i stap klostu long yu. Na tu yu no ken mangal long kisim haus bilong man i stap klostu long yu, o graun bilong em, o wokboi bilong em, o wokmeri bilong em, o bulmakau bilong em, o donki bilong em, o wanpela samting bilong man i stap klostu long yu. Ol dispela tok BIKPELA i bin tokim olgeta bilong yupela long bung long maunten, na tok i kamaut long namel long paia, na long klaut, na long bikpela tudak long nek i strong tru. Na Em i no bungim sampela tok moa. Na Em i raitim ol dispela long tupela hap ston na Em i givim tupela long mi.

Long laik, mi bin makim long retpela ing na putim namba long ol lo bilong helpim yu long lukim isi na klia long ol, olsem dispela kontrak God i bin mekim long Horep namel long Em yet na lain manmeri bilong En Israel, em i Tenpela Lo, Em bin raitim long tupela stretpela hap ston, ol kolim tu Lo bilong Moses.

Malakai 4:4
“Yupela holim tingting long lo bilong wokboi bilong Mi Moses, husat Mi tok strong long em long Horep bilong helpim olgeta Isrel, wantaim ol lo Mi raitim na ol kot.”

Dispela kontrak God i bin makim i go long wanpela kantri – long Israel. Kontrak bihain Em i bin promisim olsem bai Em mekim i go long lain manmeri bilong Israel, bai em i no stap bilong Israel tasol, tasol God i bin makim bilong ol man i no Ju tu, na bai Em i raitim i no long ol stretpela hap ston, tasol long ‘ol hap mit bilong bel’.

Hibru 8:10
“Long wanem, dispela em dispela kontrak Mi bai wokim wantaim hauslain bilong Israel bihain long ol dispela de, Bikpela i tok. Mi bai putim ol lo bilong Mi insait long ol tingting bilong ol, na raitim ol insait long ol bel bilong ol. Na Mi bai stap long ol wanpela God, na ol bai stap long Mi wanpela lain manmeri.”

Dispela ol i kolim Nupela Kontrak.

2 Korin 3:6,3
“Husat tu i bin mekim mipela ol wokman i inap bilong nupela testamen, i no bilong leta, tasol bilong spirit. Long wanem, leta i kilim, tasol spirit i givim laip…”

 “Bikos God i tokaut klia tru long yupela i stap wanpela pas bilong Kraist mipela i wokim wok long en, dispela Em i no raitim wantaim ing, tasol wantaim Spirit bilong God i stap laip, i no long ol tebol bilong ston, tasol long ol tebol bilong bodi bilong bel.”

Ol leta i kilim Pol i toktok long en em i ol leta bilong namba wan kontrak o testamen, we em i ol Lo bilong Moses o Tenpela Lo!

Hibru 10:28
“Em husat i tingim olsem lo bilong Moses i samting nating i dai na i no gat sori aninit long tok bilong tupela o tripela witnes…”

Nupela Kontrak, olsem i stap insait long promis, bai God i raitim long ol bel, inap long givim sans bilong kamap stretpela long ol husat i no bin harim lo tu – man i no Ju.

Rom 2:11-15
“Long wanem, pasin bilong tingim namba bilong ol man i no stap wantaim God. Long wanem, hamas man i bin mekim sin ausait long lo bai dai olgeta tu ausait long lo. Na hamas man i bin mekim sin insait long lo, lo bai jasim. (Long wanem, ol man i harim lo i no stretpela long ai bilong God, tasol ol man i bihainim lo bai kamap stretpela. Long wanem, taim ol man i no Ju, husat i no gat lo, i mekim long pasin bilong ol yet ol samting i stap insait long lo, ol dispela, taim ol i no gat lo, i stap wanpela lo long ol yet. Husat i soim wok bilong lo God i raitim insait long ol bel bilong ol, ol mausbel tu i stap witnes, na ol tingting bilong ol long dispela taim i sutim tok, o sapos nogat, i wokim toktok bilong bekim wanpela i go long narapela,)”

Taim Em i tekewe namba wan kontrak, na mekim ol man i bihainim Nupela Kontrak, Kraist i bin kamapim wanbel namel long ol Ju na ol man i no Ju. Em i mekim insait long Em yet tupela i kamap wanpela nupela man, wanpela bodi o Sios.

Efesas 2:14-16
“Long wanem, Em i bel isi bilong yumi, husat i bin mekim tupela wanpela, na husat i bin brukim i go daun dispela namel stret banis bilong brukim i stap namel long yumi, Taim Em i bin pinisim olgeta, long bodi bilong Em, dispela pasin birua, yes, lo bilong ol tok strong i stap insait long ol lo Em i makim, bilong mekim insait long Em Yet, long tupela, wanpela nupela man, na mekim bel isi kamap olsem. Na inap long Em i ken mekim wanbel pasin i kamap gen long tupela i go long God insait long wanpela bodi long wok bilong diwai kros, taim Em i kilim i dai dispela pasin birua long en.”

Wanem samting Kraist i bin mekim long diwai kros, em i bin kamapim wanbel namel long ol Ju na ol man i no Ju i go long God.  

Kolosi 2:14-16
“Taim Em i rausim i go ol dispela lo Em i makim Em i raitim long han i birua long yumi, dispela i tok birua long yumi, na kisim dispela i go ausait long rot, taim Em i nilim dispela long diwai kros bilong Em. Na taim Em i bin bagarapim ol hetman bilong gavman na ol man i gat pawa, Em i wokim wok bilong soim ol ples klia, taim Em i winim ol tru long dispela. Olsem na no ken larim wanpela man jasim yupela long kaikai, o long dring, ol long sait bilong wanpela de holi, o long nupela mun, o long ol de sabat…”

Wanem em i Nupela Kontrak? Em i no dispela wan God i bin givim antap long maunten, tasol em i bin kam long Jerusalem antap.

Galesia 4:22-26
“Long wanem, rait i stap pinis, long Ebraham i gat tupela pikinini man, wanpela long slevmeri, na arapela long frimeri. Tasol em husat i kam long slevmeri mama i karim i bihainim pasin bilong bodi. Tasol em husat i kam long frimeri i kam long promis. Ol dispela samting i wanpela piksa. Long wanem, ol dispela em dispela tupela kontrak. Wanpela i kam long maunten Sainai, dispela i kamapim kalabus, dispela em Hegar. Long wanem, dispela Hegar em maunten Sainai long Arebia, na i stap aninit long dispela Jerusalem i stap nau, na i stap kalabus wantaim ol pikinini bilong em. Tasol dispela Jerusalem i stap antap em i fri, husat em i mama bilong yumi olgeta.”

Mama bilong olgeta Kristen em i dispela kontrak i bin kam long antap, i kam long Jerusalem antap, em i gat ol Lo bilong Kraist, na God i bin makim bilong dispela graun olgeta.

Aposel 1:2,8
“Inap long dispela de God i kisim Em i go antap, bihain long en, Em, long wok bilong Holi Spirit, i bin givim tok strong long ol aposel husat Em i bin makim….” “Tasol yupela bai kisim pawa, bihain long taim Holi Spirit i kam antap long yupela. Na yupela bai stap ol witnes bilong Mi long Jerusalem, na long olgeta Judia, na long Samaria, na i go long las hap bilong dispela graun wantaim.”

Galesia 6:2
“Yupela i mas karim ol hevi wanpela bilong narapela, na inapim lo bilong Kraist olsem.”

Matyu 28:20
“Na skulim ol long bihainim olgeta wanem samting Mi bin tok strong long yupela. Na, harim, Mi stap wantaim yupela oltaim, yes, i go inap long pinis bilong dispela graun. Amen.”

Nupela Kontrak em i Gutnius, dispela Lo bilong Kraist Em i bin tok strong long bihainim inap long pinis bilong dispela graun.

Luk 16:16
“Lo na ol profet i stap inap long Jon. I stat long dispela taim i kam inap long nau mipela i autim kingdom bilong God, na olgeta wan wan man i strong long go insait long en.”

Namba bilong Lo bilong Moses i bin stap inap long Jon, na bihain Gutnius, Em i Nupela Kontrak, em i kamap.

Mak 1:14-15
“Nau bihain long ol i putim Jon long kalabus, Jisas i kam long Galili, na autim gutnius bilong kingdom bilong God, Na tok, Taim i kamap pinis, na kingdom bilong God i stap klostu. Yupela tanim bel, na bilipim gutnius.”

Brata bilong mi i dia Jems, yu ken painim lait insait long ol ves mi bin putim.

Namba wan kontrak God i bin givim long Horep, na em i Tenpela Lo, wantaim ol lo God bin raitim na ol kot.

Mi prea long tingting bilong yu na bilong ol Seventh Day Adventist bai klia.

God i ken blesim yu.

Tok Lukaut: Ol lain bilong tanim tok bilong mipela ol i lukaut na yusim gut tru save bilong ol taim ol i bin tanim dispela blog i go long Tok Pisin. Tasol, ControversyExtraordinary.com i no tok olsem olgeta infomesen ol i bin tanim i no gat asua bikos long sampela ol samting. Taim i gat sampela asua namel long rait i nambawan tru i stap long tok Inglis na rait ol i bin tanim long Tok Pisin, rait i nambawan tru i stap long tok Inglis i winim narapela oltaim.

Mr. Controversy

0 comments:

Subscribe to: Post Comments (Atom)