Trupela Lotu i No Save Kamapim Pasin bilong Tingim Namba bilong Man

July 13, 2019 0 Ol Toktok long Dispela


Dispela graun nau i pulap stret wantaim planti lotu lain tumas husat i strong long kolim ol yet olsem Kristen. Long wanem hap wanpela i go, klia stret bai em i bungim ol lain husat i kolim ol yet ol Kristen, na ol lotu lain husat i luksave long ol grup bilong ol yet wan wan olsem wanpela Kristen oganaisesen.

Long dispela, wanpela man nating i nidim long yusim save long luksave olsem ol lotu lain husat i kolim ol yet ol Kristen, i no olgeta yet em i ol trupela Kristen long as tru olgeta bilong dispela hap tok.

Taim yumi yusim Baibel olsem as tru bilong bilip, ol dispela grup i no soim ples klia ol mak klia tru bilong wanpela trupela Kristen oganaisesen. Nambawan olgeta, ol trupela Kristen i ol lain husat i holimpas na bihainim ol skul tok tasol bilong Bikpela Jisas Kraist.

Ol dispela manmeri na ol dispela lotu lain husat i no sem long kolim ol yet ol Kristen, tru tru ol i antikraist namba wan bikos ol i no stap aninit na ol i no bihainim ol skul tok bilong Bikpela Jisas Kraist. Ol i no pas long ol skul tok bilong Bikpela Jisas Kraist, na olgeta wan wan bilong ol dispela giaman Kristen lain i bin wokim set bilong ol bilip na ol skul tok bilong em yet, ol dispela i no wanbel wantaim ol skul tok stret bilong Bikpela Jisas Kraist.

Wanpela trupela Kristen oganaisesen i gat wanbel pasin, i no bruk nabaut. Ol trupela Kristen i wanbel long wanpela narapela. Ol trupela Kristen i gat wankain spirit, wankain tingting, wankain pasin bilong tingting, na ol i toktok long wankain samting tasol.

1 KORIN 1:10 (KJPB) i tok,

Nau mi askim yupela long daun pasin, ol brata, long nem bilong Bikpela bilong yumi Jisas Kraist, long yupela olgeta i toktok long wankain samting, na long i no ken gat ol bruk namel long yupela. Tasol long yupela i ken pas wantaim inap tru long wankain tingting na long wankain pasin bilong skelim.

I birua long dispela strongpela skul bilong Baibel, ol dispela husat ol i kolim ol Kristen grup husat i wok long kamap planti moa yet nau i gat narapela narapela bilip. Wanpela grup i bilip long Papa, Pikinini Man na Holi Spirit i stap wanpela tasol, olsem, Papa tu Em Pikinini Man, na Pikinini Man tu Em Papa, na Pikinini Man tu Em Holi Spirit. Long arapela sait, i gat narapela Kristen grup husat i tokaut long skul tok bilong Triniti. Olsem na, ol kolim ol yet olsem ol Triniterian.

Moa yet, i gat narapela husat i kolim ol yet Kristen grup, ol Momon, husat i bilip olsem i gat tok nogut antap long ol blekpela manmeri. Dispela bilip i stap insait long Buk bilong ol Momon, sapta 3, ves 6 bilong Alma, dispela i tok, "Na ol skin bilong ol Laman i blekpela, bilong bihainim mak, dispela God i bin makim antap long ol tumbuna papa bilong ol, dispela em i wanpela tok nogut antap long ol bikos long ol pasin bilong kalapim lo bilong ol na pasin birua bilong ol i go long ol brata bilong ol, husat i olsem, Nepi, Jekop na Josep, na Sam, husat i ol stretpela na holipela man." 


Sapos yu bai stadim stori bilong sios Momon yu bai painimaut pasin i no stret na pasin bilong tingim namba bilong ol man dispela lain i bin mekim i birua long ol blekpela man. Tru tru, ol i no bin mekim ol blekpela man long kamap ol ofisa insait long oganaisesen bilong ol, tasol ol waitman tasol.

Insait long The Brigham Young Journal of Discourses, Volume 5, page 332, i gat wanpela lidaman bilong lotu Momon husat bin tok, "Tasol larim ol tok nogat long bilip na ol bai gat waitgras, skin i krungut na kamap blekpela wankain olsem Seten."


Ol i bilip olsem Seten i blekpela tasol mi no bilip olsem.

2 KORIN 11:13-14 i tok,

13 Long wanem, kain man olsem em ol giaman aposel, ol giaman wokman, husat i tanim ol yet i kamap ol aposel bilong Kraist.
14 Na i no samting bilong tingting planti. Long wanem, Seten em yet i tanim i kamap wanpela ensel bilong lait.

Seten i wanpela man bilong giaman taim em i mekim em yet long kamap olsem wanpela ensel bilong lait. Taim yu tok "ensel bilong lait" em i minim em i no tudak, o blekpela, tasol waitpela.

Ol lotu lain o ol pasta husat i skulim olsem God i bin putim tok nogut antap long ol blekpela manmeri, ol i ol dispela long husat God mas putim tok nogut antap. Tru tru mi les tru long ol lain husat i tok bilas long ol blekpela man bikos tasol ol i gat blekpela skin.

No gat wanpela man mas tingim wanpela lain manmeri olsem ol i antap moa o i daunbilo moa. Maski long kala skin bilong yumi, maski long ausait luk bilong yumi, long ai bilong God yumi olgeta i stap wankain. Na saiens i tok olsem, "Long bodi sait yumi olgeta ol brata na ol susa aninit long skin." Em i no tru olsem i gat tok nogut antap long ol blekpela manmeri. Yu gat blekpela skin o waitskin, yu inap long ol man i mekim pasin i gat ona long yu.


Tru tru, i gat planti blekpela lain insait long Baibel husat God i bin blesim. Wanpela bilong ol em i dispela yunik i kam long Itiopia husat bin kisim baptais long han bilong evansilis Filip. Dispela yunik em i man bilong lukautim ol mani samting bilong king bilong Itiopia husat bin go long Jerusalem long lotuim God.

Narapela em i dispela meri Itiopia husat bin kamap wanpela bilong ol meri bilong Moses. Em tu blekpela olsem na long dispela as Eron tupela Miriam i bin tok birua long tingting bilong Moses long kisim em olsem meri bilong em. Tasol God i bin belhat long Miriam na Eron, na Em i bin putim tok nogut antap long tupela. Dispela yu ken ritim insait long NAMBA 12:1-9.

Olsem yumi ken lukim, God i no gat pasin bilong tingim namba bilong ol man. Pasin bilong tingim namba bilong ol man em i birua long laik bilong God. Mi laik tok wanem? Ol Momon i giaman olsem ol yet ol Kristen tasol ol skul tok bilong ol i birua long lotu Kristen.

Ol Kristen i lainim long mekim stretpela pasin long ol man maski ol i gat wanem namba insait long sosaiti.

JEMS 2:1-4 i tok,

1 Ol brata bilong mi, no ken gat bilip tru bilong Bikpela bilong yumi Jisas Kraist, Bikpela bilong glori, wantaim pasin bilong tingim namba bilong ol man.
2 Long wanem, sapos i gat i kam long bung bilong yupela wanpela man wantaim wanpela ring gol, long naispela klos i nambawan, na i gat i kam insait tu wanpela rabisman wantaim klos nogut tru,
3 Na yupela i gat pasin bilong tingim namba long em husat i werim klos i gat amamas, na tokim em, Yu sindaun hia long gutpela ples, na tokim rabisman, Yu sanap long hap, o sindaun hia aninit long liklik sia bilong putim lek bilong mi,
4 Ating i yes long nau yupela i skelim kranki long yupela yet, na yupela i kamap ol jas bilong ol tingting nogut?

Ol trupela Kristen i pas long ol skul tok bilong Bikpela Jisas Kraist, na wanpela bilong ol dispela skul tok em i olsem, no ken tingim namba bilong ol man. Pasin bilong tingim namba bilong ol man em i nogut. Em i kam long Seten. Lotu Momon na ol narapela lotu lain husat ol i makim lain bilong ol olsem ol Kristen husat i gat pasin bilong tingim namba bilong ol man i no ol trupela Kristen!

JEMS 2:9-10 i tok,

9 Tasol sapos yupela i gat pasin bilong tingim namba bilong ol man, yupela i mekim sin, na lo i soim tru tru olsem yupela i man bilong kalapim lo.
10 Long wanem, husat man bai bihainim lo olgeta, na yet em i bagarapim long wanpela poin, em i gat asua long olgeta.

Tok Lukaut: Ol lain bilong tanim tok bilong mipela ol i lukaut na yusim gut tru save bilong ol taim ol i bin tanim dispela blog i go long Tok Pisin. Tasol, ControversyExtraordinary.com i no tok olsem olgeta infomesen ol i bin tanim i no gat asua bikos long sampela ol samting. Taim i gat sampela asua namel long rait i nambawan tru i stap long tok Inglis na rait ol i bin tanim long Tok Pisin, rait i nambawan tru i stap long tok Inglis i winim narapela oltaim.

0 comments: